ROMRÜ 10 - AMÜSA BAIBEL (BSI)

¹ Jünirüti, Ipu nyitsarü khümchosohnung khüta Ih lümtohro! Arüh shulüm khüta Ihnü dangkhidangnangjüro!

² Arühnü Tsingrangba khyang khütang khakhuchüjürepü Ihnü yuzi jüre; ta arüh khakhuchüjüba tsü yujeba amüdhe chah müngakeh.

³ Tsingrangba chahnü roba amüsaba tsü mümüdhepü, arüh lümcho du nguchinung müküpchonü arühnü amüsaba langla mütsehre.

⁴ Yudsirü müipi langsohnung nengdang Khrista-nü Yuzeng tsü changkasohcho.

Akangcheh tsü Atümung Nengdang

⁵ Yuzeng bichichonü Tsingrangba te langsohrepü Mosa-nü thrahko: “Sünü Yuzengnü mülacho bichinang abi akang linung.”

⁶ Ta amüsa yunü yudsi khu Tsingrangba te langsohreba tsü hi: “Ninglang sü tuwünung pü nührübürü te tütsingdhing” (hütsü, Khrista nojüronungba)

⁷ “Mahkhang, alih yonglang sü züdunung pü nührünü tütsingdhing?” (Hütsü, asülih lanü Khrista nochüronungba)

⁸ Hinü yoba tsü hi lile: “Tsingrangba yu tsü nü müshüm, nü be ko nü lasih la lile” hütsü Ihsanü thsingyuba yudsi yu shulüm.

⁹ Nühnü Jisu tsü Abüdongbaepü nyengchokhang, ko nü lasih la Tsingrangba-nü abi asücho lanü kanglisohchoepü yudsikhang, nüh khümchonung.

¹⁰ Ihsa yudsinü Tsingrangba te langjüre; ko nyengchochonü khümchore.

¹¹ Amüsa yunü yore, “Sünü abi chah yudsinang abi sumüzahsohnung.”

¹² Hila atümung zehle, tunüo Jihudarü ko Greek-rü tu papa mühle; tunüo Tsingrangba tsü sako atümung Abüdongba lile ko abi dsirü atümung abinü khütang müwajüre.

¹³ Amüsa yunü yocho kyo, “Sünü Abüdongba nengla dsinang abi khümchonung.”

¹⁴ Ta arühnü müyudsikhang khüta abi te dsinung? Ko arühnü yusi tsü müyuchikhang khüta yudsinung? Ko yusi tsü müthsingyukhang arühnü khüta yuchinung?

¹⁵ Ko thsingyurü tsü mümüthehkhang yusi tsü khüta sobhonung? Amüsa yunü yocho kyo, “Yuse atsa thsingyurü jing tsü khüta atsah atsa!”

¹⁶ Ta Yuse Atsa tsü atümung nülü mükhyücho. Isaya apunü yocho, “Abüdongba sünü ihrü yu yudsicho?”

¹⁷ Hütsüpü, yudsi tsü yusi yuchicho lanü rore, ko yusi tsü Khrista thsingyucho lanü rore.

¹⁸ Ta Ihnü tsingdhingre: Yuje arühnü yusi tsü müyuchicho do? Ajüje, arühnü yuchiko tunüo amüsa yunü yocho kyo: “Arüh yuva limih apümlang jengko; arüh yunü limih achangka chihko.”

¹⁹ Adesü Ihnü yore: Israelrünü münyichehcho do? Mosa-nü akhu yo lile: “I nyitsarü nahmohsohnung Ihnü yucho khüdu bichinung; ko amüsithsa yucho khüdu khu I nyitsarüti zichürosohnung.”

²⁰ Ko Isaya-nü khüsha rezeh yore, “Sürünü Ih müyangchicho arühnü Ih ngucho; Ih mütsingchirü te Ihnü mishacho.”

²¹ Ta Israelrü nengdang abinü yore, “Yocho mühnyiba ko hongzirüti khyüchonung mükhyang I kheh müyungchü lile.”