OBADIA 1 - AMÜSA BAIBEL (BSI)

¹ Hi Obadia choyohyu Edom yucho nengdang Amichahba Abüdongba-nü hita yore. Abüdongba-nü yuchoti yang yusi hirü müthehcho, ko ihrünü abi yusi yuchiko: “Rungnüm! Ihsanü Edom nyüm khata wünung!”

Abüdongba -nü Edom Khingchinung

² Abüdongba-nü Edom te yore, “Ihnü nüh atümung tenü azau kangsohnung; nüh khütang müthsamünyüsohnung.

³ Nü müthsehnü nüh kihyochüko. Nü yangdi tsü lungzinü thsacho roshengvi; nü kuh tsü azong athseng michah lile, hütsünü nühnü yorü, ‘Sünü Ih tphahchonung?’

⁴ Müdi roh-i nühnü mong küdunye, Chenghi la nühnü nü süp shünye hütsülanü Ihnü nüh tphahchonung.

⁵ “Aführünü amala rode arüh mürucho du führe. Nyitsarünü shükusih labülungde, arühnü khürülü pehjüre. Ta nührü rorünülü nührü riri wohpehko.

⁶ Esau trah, nührü kuthsi müzüp tsicho.

⁷ Nüte tsungphung thsarünü nüh kihyochüko; arühnü nüpu lih lanü nüh iipehko. Nüte yangtsa la lirütinü nüh mahko. Nüte maritarünü nü nengdang zeng thsapüjücho; Arühnü yorü, ‘Abi hitoi athsehdhsasü khülo?’

⁸ “Ihnü Edom khingchi nyümong, Arüh athsehdhsati ko arüh lümlong apüm changjünung.

⁹ Teman rothsarü drümüyangsohnung, ko Edom la rothsarü atümung kyüsehnung.

Edom Khingchiba Yuzi

¹⁰ Nühnü Jakob trah, nü jümürüti chahnü kengcho kyüsehcho ngang nüh changnung, ko lede nengdang mükhichinung.

¹¹ Arorühnü arüh tbükhüm thsangnyang nyümong nüh jüp dhingyacho. Jerusalem kuthsi rohcho hiwü arüh yola changtarü yangpirü kyo nüh amütsa lile.

¹² Juda la nü jünirüti arotola lide nühnü mümüthsamünyüba thsako. Arüh changjü nyümong nühnü mükünyangba thsako. Arüh chongchala lide nühnü arüh mümünyodhingba thsako.

¹³ Nühnü I müyurü yangdila arüh chongcha müthsamünyü ko arüh changba nyümong arüh kuthsi khyünung müzüduba thsako.

¹⁴ Nühnü rangtsirü ranglinung langtpah la müyaba thsako. Nühnü arüh chongcha nyümong arüh rorüh kheh la arüh müjüba thsako.

Yuchoti Yukhanung

¹⁵ Ih, Abüdongba-nü yuchoti yukhanung nyümong tsü chii role. Edom, nühnü tu nguchicho, hütsü nüte nguchinung. Nühnü tu jücho hütsü nü khyang thali jünung.

¹⁶ I müyurütinü Amüsa khang chah akha akhingchi shing yongko. Ta mükangmüshü yuchotisü alaa akha akhingchi shing tsü yongnung. Arüh atümungnü yongnung ko changpehnung.

Israel Akoh

¹⁷ “Ta Zion Zong la khürü tsiyohnung, ko hütsü Amüsa müdüm thsanung. Jakob tsutpunü arüh yo alih tsü khyünung.

¹⁸ Jakob ko Josef tsutpu tsü michang kyo linung; michangnü manying tahpehcho kyo arühnü Esau tsutpu changjünung. Esau trah süsü münyingnung. Ih, Abüdongba-nü choko.

¹⁹ “Kihjinglang Juda nyitsarünü Edom khyünung; Nyüzüdu lahpi azong jingdümpila lirütinü Filistia khyünung; Israelrünü Efraim ko Samaria khyünung; ko Benjamin-nü Gilead khyünung.

²⁰ Kihku lang Israel yangtsirü rothsarünü kihku lahpi Zarefat chii Foenicia kohnung. Sardis la Jerusalem yangtsirütinü kihjinglang lahpi Juda yangditi khyünung.

²¹ Jerusalem athrungrütinü Edom mahnung ko hütsü michah yangthsanung: Ko Abüdongba apu tsü yangthsaba kangnung.”