NÜCHEHCHO 7 - AMÜSA BAIBEL (BSI)

¹ Abüdongba-nü yocho, “Farao te Ihnü nüh Tsingrangba kyo kangsohnung, ko Aron-nü abi te nü-zikehrü khüdu kyo chonung.

² Ihnü nüte yocho apüm Aron te young ko abinü yangthsaba te Israelrü tsisohnung yonung.

³ Ta Ihnü yangthsaba hongzisohnung ko Ihnü Ijip la thsayahiya khütoi khütoi nguchinye abinü nüyu mühnyinung.

⁴ Hütsüpü Ihnü Ijip michah akhingchi amülah jünung ko hütsülanü I nyitsarü nüchehnung.

⁵ Ihnü khode arüh nyüm I kheh dhimüsu arüh lih lanü I nyitsarüti nücheh tsinang, hütsüde Ijiprünü Ih tsü Abüdongba epü müdhenung.”

⁶ Mosa e Aron nyühnü Abüdongba-nü yocho kyo nguchicho.

⁷ Arühnü Farao te chota shikhe tsü Mosa kang qure ko Aron kang qurepü asang thsacho.

Aron Ja

⁸ Abüdongba-nü Mosa e Aron nyüh te yocho,

⁹ “Yangthsabanü thsayahiya khüdu nguchi yuzi jüng pü yokhang, Aron te yangthsaba bete tsü abi ja tsü tsakhuchüng pü young, ko hütsü mürü khüdu kangnung.”

¹⁰ Achotsü Mosa e Aron nyühnü yangthsaba yang wücho ko Abüdongba-nü yocho kyo nguchicho. Aron-nü yangthsaba ko abi thsazirüti bete aja tsü tsakhuchücho ko hütsünü mürü khüdu kangcho.

¹¹ Hütsüde yangthsabanü amüdherü ko amongrü dsibülungcho, ko arüh ziinü hütsü akyokyo tsü nguchicho.

¹² Arühnü arüh ja tsakhuchücho, ko ja tsünü mürü kangcho. Ta Aron janü arüh mürü tsü münyücho.

¹³ Ta yangthsaba tsü Abüdongba-nü yocho kyo ahongzi kangcho ko Mosa e Aron nyüh te mühnyicho.

Ashüh Achangbanü Ijiprü chah Xüpcho

¹⁴ Ko Abüdongba-nü Mosa te yocho, “Yangthsaba hong khütang zile ko I nyitsarü mütsisohre.

¹⁵ Hütsüeko wüng ko anyangnyü abi Nile lang jowüyade abi shirüng. Mürü kangba nü Ja tsü bieng, ko yongkhi bekhümla tsü ying.

¹⁶ Hütsüpü yangthsaba te tsü young, ‘Ibrirü Tsingrang, Abüdongba-nü abi müyurütinü wü akungaselih la abi mübünungthsa arüh tsisohng pü yonung Ih müthehcho. Ta ade yingcheh nühnü mühnyire.

¹⁷ Ade, Ahechibong, abinü tu nguchinang hütsü khu abi tsü sünang nühnü müdhenungepü Abüdongba-nü yore. Dhing, Ihnü ja hinü yongkhi hila xüpnung ko kih tsü ashüh kangnung.

¹⁸ Nguh sünung, ko yongkhi tsü khura xümchonü Ijiprünü müyongchehnung.’”

¹⁹ Abüdongba-nü Mosa te yocho, “Aron te Ijip la yongkhi, kihrü ko changtphü apüm michah abi ja dhimüsunung young. Ko kih tsü ashüh kangnung, ko yanglih apümlang, ko alihfüh la mii ashüh kangnung.”

²⁰ Achotsü Mosa e Aron nyühnü Abüdongba-nü yocho kyo nguchicho. Farao ko abi thsazirü apüm bete, Aron-nü aja dhimüsu yongkhi la tsü xüpcho ko kih tsü ashüh kangcho.

²¹ Nile yongkhi la ngu tsü sücho, ko khura xümchonü Ijiprünü kih tsü müyongchehcho. Ijip lih apüm la ashüh du licho.

²² Hütsüde yangthsaba amongrütinüsü hütsü akyokyo tsü arüh ziimongnü nguchicho, ko Abüdongba-nü yocho roh-i, yangthsaba tsü asusuh du hongzicho.

²³ Hütsü mülih Farao-nü Mosa e Aron nyüh tenü ximüla abi kulang tsipehcho.

²⁴ Ijiprü atümungnü kih ayongnung shulüm yongkhi ayung jüp jucho, tunüo arühnü yongkhi la tsünü kih tsü müyongchehcho.

²⁵ Abüdongba-nü yongkhi la tsü xüp-pü nyümong dhünyeh khu tsicho.