NÜCHEHCHO 5 - AMÜSA BAIBEL (BSI)

Farao Bete Mosa Ko Aron

¹ Hütsüpü Mosa e Aron nyühnü Farao yanglang wünü yocho, “Abüdongba, Israel Tsingrang-nü yore, ‘Lipilih la arühnü I nengla thsüti linung nengdang, I müyurüti wüsohng.’”

² Yangthsabanü tsingdhingcho, “Abüdongba tsü süo?” “Tuepü Ihnü abi yu nyi Israelrü tsisohnung? Abüdongba tsü Ihnü mümüdhe; Ihnü Israelrü mütsisohnung.”

³ Mosa e Aron nyühnü lalingcho, “Ibrirü Tsingrang apu jangjang ihrü te mishako. Ihrü Tsingrang Abüdongba khyang kangmübü jünung lipilih lang wünung ihrü khyang nyümong asang mülajüng. Ihrünü hütsü münguchikhang, rümra mahkhang khatanü ihrü süsohnung.”

⁴ Farao-nü Mosa e Aron nyüh te yocho, “Tuepü nührünü nyitsarüti arüh nguchilanü nümüiro? Ayurüti tsü nguchilang wüsohng!

⁵ Nührü nyitsarü Ijiprü tenü adronguba suchehko. Ko ade nührünü münguchinyüre!”

⁶ Hütsü nyümong tsünü yangthsabanü ayurü nyahrü ko Israelrü anüchirü te yuzengjo yocho:

⁷ “Adelü lihtah lung külüpnung manying tüjü. Arüh jangjang wü hütsü khyübülungsohng.

⁸ Ta lihtah lung tsü khüdusü mükyühchopü akhichocho ajeng akhulang roh-i külüpsohng. Arüh nguchinü münguchixahrübae, hütsünü arüh Tsingrang khyang kangmübü jünung wüsohngpü mütozah Ih longmüzire.

⁹ Nyitsarü hiri alaa müpahseh nguchisohnung nguchi alaa jüng, hütsüpü du arühnü arahkheh yu nyinung müpahnung.”

¹⁰ Achotsü ayurü nyahrü ko anüchirütinü wünü Israelrü te yocho, “Yangthsabanü nührü khyang adelü manying müchixinung yoko.

¹¹ Nührübürü jangjang wünü khyübülungnung, ta lihtah lung akhichocho tsülü asusuh külüpnung yore.”

¹² Hütsünü müyurütinü Ijip lih jeng manying yangchinung wücho.

¹³ Ayurü nyahrütinü akhulang manying jüde külüpcho toi lihtah lung tsü külüpm pü arüh khütang khingcho.

¹⁴ Ijiprü anyahrütinü Israelrü anüchirüti sürü nguchi dhingyehnung yohpücho arüh chah lahcho. Arühnü yocho, “Tuepü nührünü akhulang külüpcho toi lihtah lung mükülüpro?”

¹⁵ Hütsüde anüchirütinü wü yangthsaba te jümjüm yocho, “Adibong! Tuepü nühnü ihrü chah hita nguchiro?

¹⁶ Ihrü khyang manyinglü müjüpü, lihtah lunglü akhichocho külüpnung yuzeng jüre! Ko ade ihrü chah lahre, ko hütsü nü müyurü mülang lile.”

¹⁷ Yangthsabanü lalingcho, “Nührü ayungsüh ko münguchinyüre, hütsü khu wünü Abüdongba khyang kangmübü jünung nührü wüsohng pü Ite kihchire.

¹⁸ Ade nguchilang wüng! Nührü khyang manying müjünung, ta lihtah lunglü akhudi toi külüpm.”

¹⁹ Akhulang roh-i nyümong mükhu lihtah lung tsü akhichocho külüpnungbaepü anüchirüti te yochonü, arüh adhsangthsi la licho lümchehcho.

²⁰ Arüh tsichiyade, arüh yingyacho Mosa e Aron nyüh mütohcho.

²¹ Arühnü Mosa e Aron nyüh te yocho, “Abüdongba-nü nührü nguchi nguko ko yangthsaba ko abi thsazirünü ihrü thrünyisohcho shulüm nühjü khingchinung. Ihrü kyüsehsohnung nühjünü arüh khyang arahkheh khehyüm jüko.”

Mosa-nü Abüdongba te Longmüsü Hicho

²² Hütsüde Mosa-nü Abüdongba yang thali ropü yocho, “Abüdongba, tuepü Nühnü nü müyurü mükhimücho bichiro? Tuepü Ih hila müthehcho?

²³ Yangthsaba yanglang nü nengdang chotanung Ih wükotinü, abinü arüh khütang mütsa bichire. Ko arüh tronung Nühnü tu münguchire!”