NÜCHEHCHO 4 - AMÜSA BAIBEL (BSI)

Tsingrangba-nü Mosa Khyang Zii Jücho

¹ Hütsüde Mosa-nü lalingcho, “Ta adüzünü Israelrünü I chah müyudsikhang ko Ihnü yocho münyikhang khüta. Ko adesü nühnü I bete mümisha pü yokhang khüta?”

² Achotsü Abüdongba-nü abi te tsingdhingcho, “Nü kheh la tu biro?” Abinü yocho, “Ja khüdu.”

³ Abüdongba-nü yocho, “Alih la tsü pehng.” Khode Mosa-nü hütsü pehcho, hütsünü mürü khüdu kangcho, ko abinü hütsü bete shang tsicho.

⁴ Hütsüde Abüdongba-nü Mosa te yocho, “Mükhung ko hütsü amüyingnü thromüsung.” Achotsü Mosa-nü mükhurang hütsü rangcho ko hütsü thali ja kangcho.

⁵ Abüdongba-nü yocho, “Abüdongba, arüh jümürü Tsingrang, Abraham, Isak ko Jakob Tsingrang-nü nüte mishako pü yuzithsanung hi Israelrü te nguching.”

⁶ Abüdongba-nü thali Mosa te yocho, “Nü kheh tsü nü ququ la yohng.” Mosa-nü hütsüta nguchicho; ko khode abi kheh khyüchehcho, akheh tsü shurü kyo mübhiranü tsütipü licho.

⁷ Hütsüde Abüdongba-nü yocho, “Nü kheh tsü thali nü ququ la yohng.” Abinü hütsüta nguchicho, ko abinü thali akheh khyüchehde, hütsü akhudi roh-i kyangpehpü licho.

⁸ Abüdongba-nü yocho, “Arühnü nü chah yu müdsikhang mahkhang akhudiba thsayahiya tsünü müyudsinye, hinülü arühnü yudsinung.

⁹ Thsayahiya hinyi nguchinye arühnü yu müdsikhang, ko nühnü yocho münyikhang, Nile yongkhi lanü kih aza khachehng ko alih la tungpehng. Kih tsünü ashüh kangnung.”

¹⁰ Ta Mosa-nü yocho, “Doh, Abüdongba, Ih tümütheh. Ih yuthrungrü khüdu mah. Ih akhudinü mahkhang nühnü chotapü khanglang mii hütsüta mükang. Ih yula müxüpcheh.”

¹¹ Abüdongba-nü abi te yocho, “Sünü nyitsarü khyang be jücho? Sünü nangtbengsohro mahkhang müle jahsohro? Sünü ngusohro mahkhang nahtohsohro? Hütsü Ih, Abüdongba.

¹² Ade, wüng! Ihnü achonungla nüh tronung ko tu chonung nüte yonung.”

¹³ Ta Mosa-nü yocho, “Doh, Abüdongba, aparü khüdu müthehng.”

¹⁴ Hütsükhu Abüdongba-nü zichüro Mosa te yocho, “Levirü nümung Aron khüta? Abinü yu tsa chocho Ihnü müdhele.” Ko dhing nüh shirünung abi role ko nüh ngu abi künyangnung.

¹⁵ Nühnü abi te chotang ko tu chonung abi te young. Ihnü chonung nühjüding tronung, ko tu nguchinung nühjüding te Ihnü yonung.

¹⁶ Abi nü mülih achorü thsanung ko müyurü te nü mülih chonung. Hütsüde nüh Tsingrangba kyonü abinü chonungti yonung.

¹⁷ Nühnü hiba ja bieng; tunüo hi khu nühnü thsayahiya nguchinung.

Mosa Ijip lang Thalicho

¹⁸ Achotsü Mosa-nü aku Jethro yanglang wücho ko abi te yocho, “Ijip la jünirüti tsa mülinang shirünung wünung yanglilüm Ih wüsohng.” Jethro-nü mülacho ko abi te aza yu yocho.

¹⁹ Mosa Midian lanü mütsie, Abüdongba-nü abi te yocho, “Ijip lang thali wüng, tunüo nüh müpsehnung yangchirü atümung sükhangko.”

²⁰ Achotsü Mosa-nü atsurü ko anitpü gadu chah pümsohcho ko arüh yola Ijip lang Tsingrangba-nü yoba Ja tsü bipü shemüsucho.

²¹ Adesü Abüdongba-nü Mosa te yocho, “Adelü nüh Ijip lang thalire, yangthsaba bete Ihnü nü khyang jüba zii tsü bichi thsayahiya nguchinung tünbüchü, ta Ihnü yangthsaba hong alaa zisohnung ko abinü müyurüti mütsisohnung.

²² Hütsüde nühnü abi te, ‘Ih Abüdongba-nü Israel tsü I tsurü aukhubaepü yorepü young.

²³ Ihnü nüte I tsudhrenü Ih mübünung shulüm abi tsisohng pü yoko, ta nühnü mütsisoh. Hütsüeko ade Ihnü nü tsurü aukhuba müpsehnung.’”

²⁴ Ijip lang wüde langla Abüdongba-nü Mosa shiro abi müpsehnung müküpcho.

²⁵ Hütsüde anitpü Zippora-nü lungthsuh khüdu hiro atsudhre küp tsehpehcho ko hütsünü Mosa jing chah lüpkehcho. Amüjüp-pehba ayah khu tsünü abükyünü Mosa te yocho,

²⁶ “Nüh ashüh la rarüta I nii lile.” Hütsünü Abüdongba-nü Mosa akang rikijücho.

²⁷ Hütsütade Abüdongba-nü Aron te yocho, “Mosa shirünung lipilih lang wüng.” Achotsü abinü amüsa zong chah abi shirünung wücho; ko abi shirüde abi chah müthsüpcho.

²⁸ Hütsüta Mosa-nü Aron te Abüdongba-nü yocho lüpcho yocho: abi te Abüdongba-nü thsayahiya nguchinung yocho hütsüsü yocho.

²⁹ Achotsü Mosa e Aron nyühnü Ijip lang wücho ko Israel zirü müjang dsibülungcho.

³⁰ Aron-nü arüh te Abüdongba-nü Mosa te tuturü yocho apüm yocho ko arüh bete Mosa-nü thsayahiya apüm tsü nguchi ngusohcho.

³¹ Arühnü yudsicho ko khode Abüdongba-nü ro arüh sehchi bichicho nguko pü yuchicho, arühnü mükhukeh mübücho.