NÜCHEHCHO 3 - AMÜSA BAIBEL (BSI)

Tsingrangba-nü Mosa Dsicho

¹ Nyümong khüdu Mosa-nü Media la bebüba, aku Jethro santi nyah lide, abinü san atii tsü lipilih khu nowücho ko Amüsa zong Sinai chii rocho.

² Hütsüla Abüdongba-nü abi te singtrung khüdula mihmüle lanü chüro shirütacho. Mosa-nü singtrungla mihmüle ngucho ta hütsü mütahkehcho.

³ Abinü lümcho, “Hilü anyekanunge. Tuepü singtrung chah tsü mütahkehro? Ihnü shündhün wü dhingnung.”

⁴ Khode Abüdongba-nü Mosa tsü shündhün ro ngucho, singtrungla tsünü abi dsi yocho, “Mosa! Mosa!” Abinü lalingcho, “Ih hila lile.”

⁵ Tsingrangba-nü yocho, “Shündhünra türo. Nü jingkhüm khyüchehng, tunüo nüh yaba lih müdüm tsü Amüsa lile.

⁶ Ih nü jümürü Tsingrang lile. Abraham, Isak ko Jakob Tsingrang.” Hütsüde Mosa-nü aromih hapticho, tunüo abinü Tsingrangba romih chah dhingkehnung drücho.

⁷ Hütsüpü Abüdongba-nü yocho, “I nyitsarü Ijip la khüta mükhimücho bichiro hütsü Ihnü nguko; arüh sehchirü khehlanü khümchoungpü züdecho Ihnü yuchiko. Arüh adhsa apüm Ihnü müdhele,

⁸ hütsünü Ijiprü khehlanü arüh khümchonung ko Ijip lih lanü arüh nücheh alih asu nyikih ko thsakukih pohyaba lih, ade Kanan-rü, Hit-rü, Amor-rü, Periz-rü, Hiv-rü ko Jebus-rü liyaba lih yang nowünung Ih jürocho.

⁹ Ajüje I nyitsarünü züdecho Ihnü yuchiko ko Ijiprünü sehchicho Ihnü nguko.

¹⁰ Ade Ihnü Ijip yangthsaba yang abi lih lanü I nyitsarü nüchehnung nüh müthehre.”

¹¹ Ta Mosa-nü Tsingrangba te yocho, “Farao yanglang wü Ijip lanü Israelrü nüchehnungthsa Ih süo?”

¹² Tsingrangba-nü lalingcho, “Ih nüte zeh linung ko khode nühnü Ijip lanü nyitsarüti nüchehnung ronang, hiba zong chah nührünü Ih mübünung. Ko Ihnü nüh müthehcho yuzi hütsü thsanung.”

¹³ Ta Mosa-nü yocho, “Khode Ihnü Israelrü yanglang wü arüh te, nührü jümürü Tsingrang-nü Ih nührü yang müthehchoepü yonang, arühnü Ite, ‘Abi neng süo’ pü tsingdhingnung. Hütsüde Ihnü arüh te tu yonung?”

¹⁴ Tsingrangba-nü yocho, “Ih tsü Ih.” Arüh te nühnü hita young: Ih ko dsiba tsünü Ih nührü yanglang müthehcho!

¹⁵ Israelrü te, Abüdongba, Ih, arüh jümürü Tsingrang, Abraham, Isak ko Jakob Tsingrang-nü nüh arüh yanglang müthehchoepü young. Hiba hi lede I neng linung; aronung shangti nüsü Ite hita du dsinung.

¹⁶ Wüng ko Israelrü azirüti müjang dsimükhong ko arüh te Abüdongba, Ih arüh jümürü Tsingrang, Abraham, Isak ko Jakob Tsingrang-nü nüte chüro shirükopü young. Arüh yanglang Ih ro lile ko arüh chah Ijiprünü tu nguchiro hütsü ngukopü young.

¹⁷ Ihnü arüh aroto suro Ijip lanü nyikih ko thsakukih pohyaba, ade Kanan-rü, Hit-rü, Amor-rü Periz-rü, Hiv-rü ko Jebus-rü liyaba lih yang nowünung dhrongchehko pü young.

¹⁸ “Nühnü tu yonang Israel zirütinü hütsü nyinung. Hütsüpü azirüti zeh Farao yanglang wü abi te young, ‘Abüdongba, Ibrirü Tsingrang-nü Ihrü te misha ngusohko. Ade lipilih lang wü Ihrü Tsingrang, Abüdongba, khyang kangmübü jünung shulüm Ihrü khyang nyümong asang mülajüng.’

¹⁹ Khingnü müthsakhang, Farao-nü nührü mütsisohnungepü Ihnü müdhele.

²⁰ Ta Ihnü I tase bichi ko thsayahiya nguchi Ijiprü khingchinung. Hütsüpü du abinü nührü tsisohnung.

²¹ “I nyitsarü tside arüh khehshü mütsisohnungthsa Ihnü Ijiprü khyang nührü jengreng drüsohnung.

²² Israel-larü müipinü arüh kurümrü Ijip-larü yanglang wünung ko abükyü kuh la liba Ijip-larü masüte abükyü jengki, hon, taripi ko thsidi kohro chingnung. Hiri tsü Israelrünü arüh tsurü ko tsularüti khyang khyüsohnung, ko hütsüta arühnü Ijiprü kuthsi wohtsinung.”