NÜCHEHCHO 2 - AMÜSA BAIBEL (BSI)

Mosa Surocho

¹ Hiba shikhe Levi hung lanü adhrerü khüdunü arühbürü hung lanü khingkurü khüdu khyücho,

² ko abükyünü adhrerü khüdu nümüsucho. Khode abükyünü akhunga tsü tsara ngucho, abükyünü abi choo asang rang yohpücho.

³ Ta khode abükyünü adelü abi rang müyohpüchehcho, abükyünü thohnü kyahcho loh khüdu hirocho ko kih müzüdusohnung münatipü ko akhunga tsü hütsüla yohpü kihbekhümla yohpücho.

⁴ Hütsüpü akhunga afü tsü abi chah tu tikehnangpü khü ashulanü chehdhing yacho.

⁵ Farao tsulatpü yongkhi la tsü mütsahnung zürode akulilarüti yongkhi bekhümla rachicho. Dhrongyengnü thoh yola tsü abükyünü loh khüdu ngunü hütsü throronung kulilarü khüdu müthehcho.

⁶ Abükyünü hütsü khangthrucho ko adhrezarü khüdu ngucho. Akhunga tsünü tracho ko abükyünü abi müi lümcho. Abükyünü yocho, “Hi Ibrirü tsurü khüdue.”

⁷ Hütsüde afü tsünü abükyü te tsingdhingcho, “Hiba akhunga xükümnung Ihnü wü Ibri-larü khüdu norojü o?”

⁸ Abükyünü yocho, “He, norojüng.” Achotsü lazatpü tsünü wü akhunga apu atpa tsü norojücho.

⁹ Yangthsaba tsulatpü tsünü khingkutpü te yocho, “Akhunga hi khyüng ko I khyang rükuchehjüng ko Ihnü nü khyang angang jünung.” Hütsüta abükyünü akhunga tsü khyo rükuchehjücho.

¹⁰ Akhanglang, khode akhunga tsü lümjingcho, abükyünü abi nowü yangthsaba tsulatpü khyang jücho, ko abükyünü atsurükhung kangsohcho. Abükyü lüm la yocho, “Ihnü kih lanü abi throchehcho, hütsüeko aneng Mosa dsijünung.”

Mosa Midian lang Rang Tsicho

¹¹ Khode Mosa dhrezacho, abinü anyitsarü Ibrirü xodhingnung wücho ko arüh khingchi nguchisohcho abinü ngucho. Ijiprü khüdunü anyitsarü Ibrirü khüdu mii müpsehya abinü ngucho.

¹² Abinü dhingmükangcho ko sünüsü müngucho müdhe, abinü Ijip-ba tsü müpseh lipilih la wohtipehcho.

¹³ Nyümong khüusü abi thali wüde Ibrirü nyüh anyüh müptaya ngucho. Abinü amüthsalangba te tsü yocho, “Tuepü abürü Ibrirü lahro?”

¹⁴ Nyitsarüba tsünü yocho, “Sünü nüh ihrü michah yangthsarü ko yukharü kangsohcho? Nühnü Ijip-ba müpsehcho kyo Ih mii müpsehnyürü mah-o?” Hütsükolü Mosa tsü dronü alüm la yorü, “Ihnü nguchibasü bürünü müdheko.”

¹⁵ Khode Farao-nü atikehcho tsü yuchicho, abinü Mosa müpsehnung müküpcho, ta Mosa-nü Midian lang alinung rang tsipehcho.

¹⁶ Nyümong khüdu Mosa kihkong khüdu te pümde, Media la bebürü Jethro tsularüti arüh dhünyeh, kih khanung ko aurü san ko miza khyang tihnung akongla kih tungyohnung rocho.

¹⁷ Ta san nyahrü khürünü Jethro tsulatpürü iipehcho. Achotsü Mosa-nü wü arüh khümcho arüh kanglungrü khyang kih tihcho.

¹⁸ Arüh au yanglang thali rode, abinü tsingdhingcho, “Chünyelü tuepü hitoi mütoh lungro?”

¹⁹ Arühnü yocho, “Ijiprü khüdunü san nyahrü khehlanü ihrü khümchopü, adesü ihrü khyang kih khajüpü ihrü kanglungrü khyangsü kih kha tihchoe.”

²⁰ Abinü arüh te tsingdhingcho, “Khang abi khülo? Tuepü abi hütsüla pehjü rocho? Wüng ko abi dsiro Ihsa yola tsuyongsohng.”

²¹ Hütsüta Mosa-nü hütsüla linung nyengchocho ko Jethro-nü atsulatpü Zippora te kukangjücho.

²² Abükyünü abi khyang azarü khüdu nümüsujücho ko Mosa-nü alüm la, “Ih hiba lih la shirü khüdue, hütsüeko Ihnü aneng Gershom” pü dsijünung.

²³ Kang rüm-o tsipü Farao yangthsaba sücho, ta hiba bekhyah chii Israelrü ayurü surola rühchi atrorü mükhyah licho. Arüh züdecho Tsingrangba chii küducho,

²⁴ ko abinü arüh rühchicho yuchicho ko Abraham, Isak ko Jakob te abi azengtacho lümchehcho.

²⁵ Abinü Israelrü ayurü suro ngucho ko arüh shulüm dhsa lümcho.