NENGSEKHI 96 - AMÜSA BAIBEL (BSI)

Tsingrangba Amichahba Yangthsaba

¹ Abüdongba te khi asi khüdu thsaang! Limih apüm, Abüdongba te khi thsaang!

² Abüdongba te khi thsaang ko Abi seing! Nyümong mükhu Abi akangcheh sobhoung.

³ Yuchoti te Abi ahechi ko nyitsarü atümung te Abi akohba nguchi tsü sobhoung.

⁴ Abüdongba tsü amülah ko dee senung athsalang; tsingrangti apüm michah Abi alaa dhichinung aleng.

⁵ Aparü yucho tsingrang apüm kyothri du lile, ta Abüdongba-nü ningti thricho.

⁶ Ahechi ko adhichi Abi mükang lile; zii ko atsah atsanü Abi amübükuh jeng lile.

⁷ Abüdongba seing, limih chah lirü apüm; Abi ahechi ko akohba seing.

⁸ Abi ahechi neng seing; Abi amübükuh yang amübü hirung.

⁹ Amüsabala Abüdongba mübüng; Limih apüm, Abi jingte dhridhrieng.

¹⁰ Yucho apüm te young, “Abüdongba tsü yangthsabong! Alimih tsü drengdreng yohpüle ko mühachinung mükoh; Abinü yuje la yuchoti yukhanung.”

¹¹ Künyang, ning ko alih! Kihdi ko hütsüla liba akang apümnü khong;

¹² Künyang, rangmü ko hütsüla libati apüm! Abüdongba limih la yangthsanung rode,

¹³ mürong la singdongtinü akünyangnü züdenung. Abinü alimih yuchoti Amüsa ko yujenü yangthsathsanung.