NENGSEKHI 95 - AMÜSA BAIBEL (BSI)

Nengse Khi

¹ Rung, Ihsanü Abüdongba senung! Ihsanü Ihsa tsungtibong Tsingrang te akünyang khi thsanung!

² Ihsanü Abi jingte anengse jo ronung ko anengse akünyang khi thsanung.

³ Tunüo Abüdongba tsü akohba Tsingrang lile, tsingrangti apüm michah Akohba yangthsaba.

⁴ Abinü limih apüm michah lungkoh asoh-u lanü akhang amungthriba michah yangthsare.

⁵ Abinü külüpcho kihdi michah; ko Abinü thricho limih chahsü yangthsare.

⁶ Rung, Ihsanü mükhukeh Abi mübünung; Ihsanü Abüdongba Ihsa thribong jingte mükhukehnung!

⁷ Abi Ihsa Tsingrang; Ihsa Abinü xükümba nyitsarüti, ko Abinü chixiba santi. Chünye Abinü yocho nyieng.

⁸ “Meriba la nührü jümürüti, Masa lihpi la arühnü roh-i, nührü lasih tümüküp.

⁹ Arühnü I nguchi ngupü mii, Ih thsadsücho ko düzodhingcho.

¹⁰ Ih kang yüre hiri nyitsarü te mübhimülongcho. Ihnü yocho, ‘Arüh khütoi yocho mühnyiro! Arühnü I yuzeng mübichire.

¹¹ Ihnü zichüro yuchüm khüdu külüpcho: Ihnü akyahshang jünung liba lih la tsü, nührünü khodesü müzüdunung.’”