NENGSEKHI 94 - AMÜSA BAIBEL (BSI)

Tsingrangba Atümung Yukharü

¹ Abüdongba, Nüh rühyangba Tsingrang; Nü rihlong mishang!

² Nüh atümung yukhabong; shemüsung ko amüthsehrü khyang arüh aleng jüng!

³ Amütsarü khütoi nyahli künyangsohnung? Khütoi nyahli yohpüjünung, Abüdongba.

⁴ Khütoi nyahli thsamehrütinü arüh nguchi nengdang tüzümükhüm müthsehnung?

⁵ Abüdongba, arühnü Nü nyitsarü dhrümchire, arühnü Nü müyurü sehchire.

⁶ Arühnü chomilarü ko mürürüti kyüsehre, ko Ihsa lih la liba shirü müpsehre.

⁷ Arühnü yorü, “Abüdongba-nü ihrü müngu; Israel Tsingrang-nü ihrü mütsüp.”

⁸ Müyurüti, nührü khüta hitoh-i dohro? Nührünü khode nyichehnung?

⁹ Tsingrangba-nü Ihsa nangku külüpcho, Abinü müyuchinung do? Abinü Ihsa nahtse külüpcho, Abinü müngunung do?

¹⁰ Yuchoti Abinü yübüre, Abinü arüh mükhingchinung do? Abi atümung adorü lile, Abinü mümüdhenung do?

¹¹ Abüdongba-nü arüh lasih müdhele; tunüo arüh lüm müpisacho Abinü müdhele.

¹² Abüdongba, Nühnü thülaba nyitsarü ko Nühnü yuzeng thongurü nyitsarü khüta akünyangnung!

¹³ Amütsarü shulüm shukuh müjude thsamütsa nyümong lanü abi kyahshangsohng.

¹⁴ Abüdongba-nü amüyurü müpehjünung; Abinü Abi yo müthrüchahchüpehnung.

¹⁵ Yukhachah yuje tsü thali mishanung, ko Amüsarü atümungnü yuje tsü khümnung.

¹⁶ I nengdang amütsarü nyüm sü yacho? Amütsa nguchirü nyüm I lahpi sü zehcho?

¹⁷ Abüdongba-nü Ih mürükurelang, sahmüthsa liba limih yang Ih zah tsipehpü liba thsako.

¹⁸ Ihnü yocho, “Ih khülule” ta O Abüdongba, amüthrehba amüinü Ih ranglicho.

¹⁹ Khode Ih lümtpanaro, Nühnü Ih tbachijüre ko künyangsohre.

²⁰ Yujemücho yukharü sünü arahkheh alanglang kangsohro,

²¹ sünü nyitsarü atsa nyüm yaro ko yuje chorü süsohro, abi te Nüh anguchinung tu mühle.

²² Ta Abüdongba-nü Ih khümre; I Tsingrang-nü Ih tsungtire.

²³ Arüh mütsa ngang Abinü arüh khingchinung, ko arüh münyi nengdang arüh changjünung; Abüdongba Ihsa Tsingrang-nü arüh changjünung.