NENGSEKHI 92 - AMÜSA BAIBEL (BSI)

Nengse Khi

¹ O Tsingrang, Nü khyang nengse jünung khüta atsa, O amichahba Tsingrang, Nü nengsekhi thsanung khüta atsa.

² Nyangnyü mükhu Nü amüi sobhonung, ko romang mükhu Nü yuje sobhonung,

³ tbenglah, honglilah ko bongphelu bi Nüh senung khüta atsa.

⁴ O Abüdongba, Nüh akohba nguchinü Ih künyangsohre; Nühnü tu nguchicho hütsü nengdang Ihnü akünyangnü khi thsare.

⁵ Abüdongba, nü nguchi khüta amülah! Nü lümcho khüta asoh!

⁶ Hi amüsithsarünü müdhenung mükoh; adohrünü nyichehnung mükoh.

⁷ Amütsarü za kyo zinung, thsamehrü zehzangnung; ta arüh riri changnung,

⁸ tunüo Abüdongba, Nüh achangka müli akohba.

⁹ Nü rorüti changnung, ko amütsarüti atümung kohchehnung ihrünü müdhele.

¹⁰ Shohjü kyo Nühnü I jüh dhimüsu rezehsohcho; Nühnü tuji asinü Ih müyühjücho.

¹¹ Ihnü I rorüti kohchehcho nguko ko amütsarü khongcho yuchiko.

¹² Sedong kyo Amüsarü zinung; Lebanon la Cedar sing kyo arüh zinung.

¹³ Abüdongba tbü la khyümcho, sing kyo, Ihsa Tsingrang Amübükuh la zicho kyo,

¹⁴ shinye asih sihre, ko lede rezeh ko axeng lire.

¹⁵ Hinü Abüdongba tsü yuje-epü ngusohre, Abi chah tu mülang mühle.