NENGSEKHI 90 - AMÜSA BAIBEL (BSI)

VAKHA MÜYÜ (Nengsekhi 90— 106) Tsingrangba ko Nyitsarü

¹ O Abüdongba, shang apüm la Nüh ihrü alichah thsa roko.

² Azongti mükülüpde mahkhang limih müthride, Nüh müchangkaba Tsingrang licho, ko lede Nüh Tsingrang linung.

³ Nühnü nyitsarü apu akhudi tu licho hütsü kangnung yore; Nühnü abi thali alih kangsohre.

⁴ Nü jingte kang hajar khüdu tsü nyümong khüdu kyole; arüh atü kyo tsipehko, amala rehtseh akhikyah kyole.

⁵ Kihmülümnü kyo ihrü müyehtsisohre; melang roh-i du ihrü akhikyah lire. Ihrü za roh-i anyangnyü thümlangnü

⁶ zi ko api pipü anyüzehlang mükutpah sücho kyole.

⁷ Nü zichürochonü ihrü changsohko; Nü rihlongnü ihrü nehsehko.

⁸ Ihrü münyi Nü bete misha lile, ihrü arang münyinü Nüh müdhele.

⁹ Nü zichürochonü ihrü akang akhikyah kangre; asah khüdu kyo changpehre.

¹⁰ Ihrü kang nyühre du linung, kutsüpnye kang qure du linung; ta hütsüla chongcha rotonü jeng lile; akang zah khu tsire, ihrüsü khu tsire.

¹¹ Sünü Nü zii müdhekhangnung? Nü rihlongnü tu adrünung hironung sünü müdhecho?

¹² Ihrünü lümlong ali kangnung nengdang, ihrü akang hi khütoichah linung young.

¹³ Nü zichüroba khütoichah linung? O Abüdongba, Nü dikehrü chah chomang!

¹⁴ Ihrü akang ayung künyang linungthsa, nyangnyü mükhu Nü amüthrehba amüinü jengjüng.

¹⁵ Ihrü chongcha lide Nühnü ihrü wahsohcho shidüm ihrü khyang akünyang bholo jüng.

¹⁶ Ihrü, Nü dikehrüti khyang Nüh akohba nguchi ngusohng; Ihrü shümtsurüti khyang Nü ahechi akohba ngusohng.

¹⁷ Abüdongba ihrü Tsingrang, ihrü yola Nü amüwa lieng. Ihrü nguchicho apüm la akoh jüng!