NENGSEKHI 9 - AMÜSA BAIBEL (BSI)

Yuje Nengdang Nengse Jücho

¹ I lasih apümnü Ihnü Nüh senung, Abüdongba; Nühnü anyemüyangnung nguchicho apüm nengdang Ihnü yonung.

² Nü khyanglangnü akünyangnü khi thsanung. Ihnü Nü nengsekhi thsanung, Akohbong Tsingrang.

³ Nüh ngude I rorütinü shehli tsire; Arüh khülure ko süre.

⁴ Nüyu khacho amüchong ko yuje lile, Ko Nühnü I phikhüm yukhako.

⁵ Müyudsirü Nühnü mülang jopehko ko amütsarü changjüko; Arüh adelü mülümchehnung.

⁶ Ihrü rorüh lede nengdang changjüko; Nühnü arüh yangditi thsangnyangjüko, Ko arüh sehseh nbüchüpehko.

⁷ Ta Abüdongba tsü achangka müli yangthsaba; yukhanung pümji rungnümpehko.

⁸ Abinü Amüsabala yangthsare; yuje Abinü yuchoti yukhare.

⁹ Abüdongba tsü asehtirü tsikehsing; dhsangthsila ku münyichah.

¹⁰ Sünü Nüh müdhero, Abüdongba, arühnü Nü chah longlangnung; Nü yanglang rorüh süsü Nühnü müpehjüre.

¹¹ Zion la yangthsabong Abüdongba nengse khi thsaang! Liküp te Abinü nguchicho young!

¹² Tsingrangba-nü dhsa lirü lümchehre; Abinü arüh züdecho münbüchüre, ko arüh thsamehsohrü Abinü khingchire.

¹³ Ite chomang, O Abüdongba! I rorütinü Ih dhsasohcho hi dhingdhing. Asü lanü Ih khümchoung, O, Abüdongba.

¹⁴ Jerusalemrü bete yapü tu nengdang Ihnü Nüh sero hütsü apüm yonung. Nühnü Ih khümchocho ngang Ihnü künyangnung.

¹⁵ Müyudsirünü shukuh jucho ko hütsüla dhrümyohcho. Arühbürü zeng la arüh xohcho.

¹⁶ Abüdongba-nü yuje yukhacho khu apu mishako, ko amütsarü arühbürü nguchinü arüh xohko.

¹⁷ Amütsarü ko Tsingrangba müdrürü atümung asülih yang züdunung.

¹⁸ Thsamütsarü ledelü müpehjünung; ailümrü alongdi lede nengdang müthsangnyangjünung.

¹⁹ Rung, Abüdongba! Nyitsarü khyang Nüh tümünyisoh! Müyudsirü tsü Nü jingte norung ko arüh michah yukhaang.

²⁰ Arüh tsü drüsehsohng, O Abüdongba; Arüh tsü asüba nyitsarü khüdu duepü arüh khyang müdhesohng.