NENGSEKHI 89 - AMÜSA BAIBEL (BSI)

Limih Thsamütsa Khi

¹ O Abüdongba, Nü müthrehba amüi nengdang Ihnü lede khi thsanung; Ihnü Nü yuje nengdang müchangkapü sobhonung.

² Nü amüi tsü lede linung ko Nü yuje tsü ning kyo, akhümkhüm thsanung Ihnü müdhele.

³ Nühnü yocho, “Ihnü throchehba nyitsarü te Ihnü azengtacho külüpko; Ihnü I dikehrü David te nyengchoko.

⁴ ‘Nü chahnü trahchocho lede yangthsarü linung; Ihnü Nü pümji lede riki yohpünung.’”

⁵ Ningnü Nüh anyemüyangnung nguchi nengdang khi thsare; arühnü yuje nengdang khi thsare, Abüdongba.

⁶ Ninglang süsü Nüh kyo mühle, Abüdongba; ninglangrü süsü Nüte sako mühle.

⁷ Amüsarü ashimükhongla Nüh dhichire; ko arüh atümungnü Nüh drü yare.

⁸ Abüdongba, Akohba Tsingrang, Nüh kyo rezeh süsü mühle; atümungla Nüh yuje lile, O Abüdongba.

⁹ Nühnü rihlong kihdi michah yangthsare; zichüro liba kiloh Nühnü zahsohre.

¹⁰ Nühnü Rahab nyehseh hütsü müpsehcho; Nüh akohba renü Nü rorüti kohchehcho.

¹¹ Ning ko alimih Nüyo; Nühnü alimih ko hütsüla liba lüpcho külüpcho.

¹² Nühnü Kihku ko kihjing thricho; Tabor khang ko Hermon khangnü akünyangnü Nüte khi thsare.

¹³ Nüh khütoh-i tase azeh! Nü re khüta amülah!

¹⁴ Nü yanglih tsü Amüsaba ko yuje michah müdongkeh lile; Nü nguchi apüm la amüi ko longlangba ngure.

¹⁵ Sünü khi thsa Nüh mübüro, sünü amüi atsingsela liro arüh akünyangnung!

¹⁶ Nü nengdangnü arühnü mükhyang künyangre, ko Nü tsacho nengdang arühnü Nüh sere.

¹⁷ Nühnü ihrü khyang akoh amülah jüre; Nü amüila Nühnü ihrü akohrü kangsohre.

¹⁸ O Abüdongba, Nüh ihrü tsung; Nüh ihrü Tsingrang Israel Amüsaba yo.

David te Tsingrangba Anyengchocho

¹⁹ Papade münguchehla Nü longlangchehba dikehrü te Nühnü yocho, “Ihnü anengkhong rothsarü khüdu khyang arüku jüko; Ihnü müyurü yolanü throchehcho khüdu khyang yangthsaba pümji jüko.

²⁰ Ihnü I dikehrü David Amüsa tujinü müyühjü yangthsarü kangsohcho.

²¹ I tase lede abi te linung, I ziinü abi rezeh kangsohnung.

²² Abi rorünü khodesü abi mükohnung; amütsarünü abi mükohnung.

²³ Ihnü abi münyehrüti changsohnung, ko abi thrünyirü atümung müpsehnung.

²⁴ Ihnü Abi müinung ko longlang linung; Ihnü lede Abi akoh ngusohnung.

²⁵ Abi yanglih Mediteranean lanü Eufrates yongkhi chii zikehjünung.

²⁶ Abinü Ite yonung, ‘Nüh Iu ko I Tsingrang; Nüh I tsungtirü ko Kangchehjüba.’

²⁷ Ihnü abi I tsurü aukhuba, yangthsarüti yola adiuba kangsohnung.

²⁸ Ihnü abi te azengchotacho lede yohpünung, ko I anyengchocho lede yohpünung.

²⁹ Abi pümji apümpü linung; abi trah lanü lede yangthsarü linung.

³⁰ “Ta abi trahnü I yuzeng mübichikhang ko I yuzeng münyikhang,

³¹ arühnü I athülaba mükhichikhang ko I yuzeng müyohpükhang,

³² Ihnü arüh münyi nengdang arüh khingchinung; arüh thsamehcho nengdang arüh chongchasohnung.

³³ Ta Ihnü David mümüizahnung mahkhang anyengchocho müyohpüpü mülinung.

³⁴ Abi te azengtacho müthsangnyangnung mahkhang anyengchocho tusü mükhyülinung.

³⁵ “Lede nengdang I neng Amüsa nengla yuchümko: Ihnü David te khodesü arahkheh müchonung.

³⁶ Lede abi chahnü sihcho linung, nyü müzüdu tashi Ihnü abi yanglih dhingyehjünung.

³⁷ Hütsü ningchah yuzi kyo, chonu roh-i apümpü linung.”

Arorühnü Yangthsaba Mahchehcho Alongri

³⁸ Ta Nühnü throchehba yangthsaba te zichürore; Nühnü abi pehjücho ko mükhyücho.

³⁹ Nü dikehba te azengtacho thsangnyangko, ko abi kuthri chongbongla münyijüko.

⁴⁰ Abi yangdi tbü rehnah khülusohko ko roshengvi thsangnyangjüko.

⁴¹ Alahkhurü atümungnü abi yo führe; kurümkushü atümungnü abi münyodhingre.

⁴² Nühnü abi rorüti khyang akoh tsü jüko; Nühnü arüh atümung künyangsohko.

⁴³ Abi thsunohrü akhyüchah müli kangsohko ko rothsala abi kohchehsohko.

⁴⁴ Abi yangthsaba ja khyümüiko ko yangthsaba pümji khülusohko.

⁴⁵ Abi akyang müchie shisohko ko ashahnü jengsohko.

Nüchehnung Kihchicho

⁴⁶ Abüdongba, Nühnü lede nengdang rangpehnung do? Nü zii michang kyo khütoi nyahli trunung?

⁴⁷ I kang khüta akhikyah hütsü lümchehng; Nühnü ihrü asünung thrichoepü lümchehng!

⁴⁸ Sülü khodesü müsüpü akang linung? Nyitsarü sülü kong tenü za lichehnung?

⁴⁹ Abüdongba, papade Nü amüthrehba amüisü khülo? David te nyengchobasü khülo?

⁵⁰ Ih Nü dikehrü khüta nyüpmüsehcho, ko müyudsirünü khüta chokehcholarü ko Ihnü rangchocho hütsü tünbüchü.

⁵¹ O Abüdongba, Nü rorütinü Nühnü throchehcho yangthsaba nyüpmüsehre.

⁵² Abüdongba müchangkapü seing! Amen! Amen!