NENGSEKHI 88 - AMÜSA BAIBEL (BSI)

Arüku Nengdang Züdecho

¹ Abüdongba Tsingrang, I Kangchehjüba, Ihnü mükhyang züdere ko amala Nü jingte rore.

² I dangkhidangnang nyijüng; I züdecho nyijüng.

³ I nbü thsamütsanü jeng lile ko I kang asülih amünyethsa lile.

⁴ Sünungthsa lirüti kyo Ih lile; I tase apüm kingkako.

⁵ Ih asürü yola thrüchahchüpeko; akyüsehcho kong la yüpjocho kyo, Nühnü mütrochehnungthsa khüdupinü nbüchüpehpü libati kyo Ih kangko.

⁶ Nühnü Ih kong la amarürah-u ko asoh-u, Shukuh la Ih dhiyohchüko.

⁷ Nü rihlongnü Ih niisehre, ko hütsü kihlohnü Ih mülümphare.

⁸ I shangrütinü Ih pehjüsohre; arüh nengdang Ih tsü adrünung kangsohko. Ih mütsichehnungthsa khangtiko;

⁹ chongcha khu I nah mii rümrümre. Abüdongba Ihnü nyümong mükhu Nüte dsire; ko dangkhidangnang I kheh dhimüsure.

¹⁰ Asürü nengdang thsayahiya nguchirü do? Arühnü suro Nüh serü mah-o?

¹¹ Kong la Nüh amüthrehba amüi nengdang mahkhang achangbala Nü longlangba nengdang chonung mah-o?

¹² Nü thsayahiya amarürah la mahkhang Nü tsachoba nbüchüpehcho limih la ngunung mah-o?

¹³ Abüdongba, arüku nengdang Nüte dsire; nyangnyü müthe Nüte dangkhidangnangre.

¹⁴ Abüdongba, tuepü Ih mükhyüchoro? Tuepü I tenü ximüla tsiro?

¹⁵ I zadenü, Ih chongchare ko asü münyeh lirore; Nü akhingchi bhamülingnü Ih niisehre.

¹⁶ Nü rihlongnü Ih nyehsehre; Nüh adrünung abebanü Ih changjüre.

¹⁷ Kihmülümnü kyo mükhyang arühnü Ih lohtire; atümung langnü Ih mükangtire.

¹⁸ I shangrükhungnü mii Ih thrüchahchüpehre; ko I shangrü tsü amarürah du tsü lile.