NENGSEKHI 86 - AMÜSA BAIBEL (BSI)

Arüku Nengdang Kihchicho

¹ Abüdongba, Iyu nyijüng ko Ite laling, tunüo I atrorü mühle ko re müzeh.

² Asü lanü Ih khümchoung, tunüo Ihnü Nü yocho nyire; Ih khümchoung, tunüo Ih Nü dikehrü ko Ihnü Nü chah longlangre.

³ Nüh I Tsingrang lile, Ite yanglilüm; Ihnü Nüte mükhyang dangkhidangnangre.

⁴ Nü dikehrü künyangsohng, O Abüdongba, tunüo I dangkhidangnang Nüh yang kürore.

⁵ Nühnü ihrü te tsare ko mülang pehjüre, Nüte kihchirü atümung te müthrehba amüinü jeng lile.

⁶ Abüdongba, I dangkhidangnang nyijüng; I kihchicho nyieng.

⁷ Dhsangthsila Ihnü Nüte dsire, tunüo Nühnü I dangkhidangnang lalingre.

⁸ O Abüdongba, Nüh kyo tsingrang mühle, Nühnü kyo sünüsü münguchi.

⁹ Nühnü külüpcho yanglih apümnü ro Nü jingte mübünung; arühnü Nüh dicho senung.

¹⁰ Nüh Akohbong, anyemüyangnung nguchire; Nüh du Tsingrangba.

¹¹ Abüdongba, I khyang tu nguchisohnyüro Ite young, Ihnü yuje cho hütsü nguchinung; Ihnü khakhuchüjo Nüh dikehnung thongung.

¹² Ihnü I lasih apümnü Nüh senung O Abüdongba; I Tsingrang Ihnü Nü dicho lede senung.

¹³ I nengdang Nüh amüthrehba amüi khütoh-i! Nühnü kong lanü Ih khümchoko.

¹⁴ O Tsingrang, Ih nyüm amüthsehrüti role; akhürahrüti sürünü Nüyu mühnyiro arühnü Ih müpsehnung müküpre.

¹⁵ Ta O Tsingrang, Nüh yanglilüm ko amüi Tsingrang, lede arangcho, lede amüi ko yuje.

¹⁶ Ih yang ximülaang ko Ite yanglilüm; I rezehsohng ko Ih khümchoung, tunüo I tpanü roh-i Ihnü Nüh dikehre.

¹⁷ Abüdongba, Nü tsacho Ite yuzi ngusohng; Nühnü Ih tbachijüde ko trocho ngude, I thrünyirüti ashah khyünung.