NENGSEKHI 84 - AMÜSA BAIBEL (BSI)

Tsingrangba Kuh Mükhyahcho

¹ Akohba Tsingrang, Ihnü Nü Amübükuh khüta müiro!

² Ih hütsüla khütang linyüre! Abüdongba amübükuh la linung mükhyahre. Akang liba Tsingrang te akünyangnü I kang apümnü khi thsare.

³ Tbütphü uza mii asüp lile, ko jingmülilarü, arühbürü kuh lile; arühnü arüh za Nü bholu shündhün yohpüre. Akohba Abüdongba, I yangthsabong ko I Tsingrang.

⁴ Lede Nü nengsekhi thsanü, amübükuh la lirü khüta akünyangnung.

⁵ Sürü tase Nü chahnü roro, sürünü Zion Khanglang shitseh wünyüro, arüh khüta akünyangnung.

⁶ Arühnü Baka ngah khu tside, hütsü kihnatung kangre; mütoh roba tsingnü hütsü kihting kangsohre.

⁷ Arüh wüde alaa rezeh kangre; Zion la arühnü tsingrangti yola Tsingrang ngunung.

⁸ I dangkhidangnang nyijüng, Abüdongba Akohba Tsingrang. Nyieng, O Jakob Tsingrang!

⁹ O Tsingrang, Nühnü throchehcho ihrü yangthsaba müwajüng.

¹⁰ Nü kuh la nyümong khüdu tsü, apalang hajar khüdu licho tenü atsau; Amütsarü kuh la linung tenülü I Tsingrang kuh la trahtri nyahrü thsanung.

¹¹ Abüdongba tsü Ihsa tsungtirü amüi, ko adhichinü Ihsa müwajüba ahechi yangthsabong lile. Athsalang nguchirü te Abinü atsa tusü müdhsonglire.

¹² Akohba Abüdongba, Nü chah longlangrü khüta akünyangnung!