NENGSEKHI 83 - AMÜSA BAIBEL (BSI)

Arorüh Kohnung Kihchicho

¹ O Tsingrang, sahmüthsa tüli; naying tüli, yah-a du tüli!

² Dhing, Nü rorütinü Nüh nyümre, ko Nü thrünyirütinü thsare.

³ Arühnü Nü nyitsarü nyüm rang lümchung külüpre; Nühnü phikhüm yohpürüti nyüm yare.

⁴ Arühnü yorü, “Rung, Israel neng lede nbüchünungthsa, Ihsanü arüh yucho thsangnyangjünung.”

⁵ Arüh lümchung la arühnü lümtrümre ko Nüh nyüm arühnü azengchotaba külüpre:

⁶ Edomrü ko Ishmaelrü; Moab-rü ko Hagrit-rü;

⁷ Gebal-rü, Amon-rü ko Amalek-rü, ko Filistiarü ko Tyre-rü.

⁸ Ko Assyriarüsü arüh yola zehko, Arüh Lot chahnü sihchocho rezeh athrungrüti lile.

⁹ Kishon yongkhi la Nühnü Median-rü, Sisera, ko Jabin-rü te tu khüta nguchicho hütsü kyo arüh te nguching.

¹⁰ Nühnü arüh Endor la kohchehcho, ko arüh me alih la sühchehcho.

¹¹ Oreb ko Zeeb te nguchicho kyo arüh langnürüti te nguching; Zebah ko Zalmuna te nguchicho kyo arüh yangthsarü atümung kohjüng.

¹² Arühnü yocho, “Tsingrangba lih tsü ihrünü khyünung.”

¹³ O Tsingrang, asongsong kyo arüh mehpehng, mayü kyo nyübongnü fotsisohng.

¹⁴ Michangnü rangmü mürohcho kyo, mihmülenü azong mürohcho kyo,

¹⁵ Nü tsingxinyübongnü arüh iiching ko Nü nyübongnü arüh nehsohng.

¹⁶ O Abüdongba, ashahnü arüh romih hapsohng, ko arühnü Nü zii müdhesohng.

¹⁷ Arüh ashah khyüsong ko lede nengdang arüh nehsohng; arüh wahseh süsohng.

¹⁸ Limih apüm michah Nüh du tsü Abüdongba ko amichahba yangthsabaepü arüh khyang müdhesohng.