NENGSEKHI 80 - AMÜSA BAIBEL (BSI)

Yucho Ngulinung Akihchiba

¹ O Israel san-nyahbong, ihrü te nyieng; Nü santi langnübong, ihrü te nyieng. Nü yangthsaba Cherufim chah pümpü,

² Efraim, Benjamin ko Manase hung te Nü jangjangthsa mishang. Ihrü te Nü tase ngung; rung ko ihrü khümchoung!

³ Ihrü nüli rung, O Tsingrang! Ihrü te yanglilüm, ko ihrü khümchonung!

⁴ O Akohba Abüdongba Tsingrang, Nü nyitsarü akihchiba te Nühnü khütoi nyahli zichüronung?

⁵ Nühnü ihrü khyang alongri tüpko, nahshükih shing amülah tihko.

⁶ Mükangmüshü yuchoti khyang ihrü lih nyüm khatasohre; Ihrü rorünü ihrü nyüpmüsehre.

⁷ Ihrü nüli rung, O Amichahba Tsingrang! Ihrü te yanglilüm, ko ihrü khümchoung!

⁸ Ijip lanü Nühnü shükusih hirocho; yucho parü iipehpü arüh lih la hütsü khyümcho.

⁹ Hütsü khyümnung müdüm khüdu müsuchehcho; ara asoh züducho ko alih apüm la hütsü shüchicho.

¹⁰ Hütsünü azong apüm shüticho; ajengzatinü Cedar singdong arangcheh shüticho.

¹¹ Hiba ajengza tsünü Mediteranean kihdi ko Eufrates yongkhi chii shüchicho.

¹² Tuepü hütsü mükang tbü khülusohcho? Adelü alahkhurü masünü shükusih fühnung.

¹³ Shunyahnü hütsü dhrümchire, ko rangmü kanglungrü hütsünü kangre.

¹⁴ Ihrü yang ximülaang, Akohba Tsingrang! Ihrü chah dhingchahchüng; rung ko Nü nyitsarü khümchoung!

¹⁵ Rung ko Nühnü khyümba shükusih hi khümchoung, hiba Nü shükusih hi rezeh zile!

¹⁶ Arorühnü michangnü tahre ko kyüsehre; arüh chah zichüro dhing ko arüh changsohng!

¹⁷ Nühnü throchehcho nyitsarüti ko Nühnü hitoh-i rezeh kangsohba yucho, tsungtieng ko rikieng.

¹⁸ Nü tenü khodesü za mütsinung; ihrü akang yohpüjüng ko ihrünü Nüh senung.

¹⁹ Ihrü nüli rung, Abüdongba Akohba Tsingrang. Ihrü te yanglilüm ko ihrü khümchoung.