NENGSEKHI 79 - AMÜSA BAIBEL (BSI)

Yucho Nüchehnung Akihchiba

¹ O Tsingrang, müyudsirünü Nü lih mahko. Arühnü Nü Amüsa amübükuh münyijüko ko Jerusalem thsangnyang pehjüko.

² Arühnü Nü nyitsarü me hogon khyang, ko Nü dikehrüti me rangmü kanglungrü khyang tsusohnung jüko.

³ Arühnü Nü nyitsarü shüh kih roh-i khatohko; Jerusalem apüm kih roh-i ashühnü pohko, ko asürü me rangnung süsü münyingcho.

⁴ Mükangmüshü yuchotinü ihrü nyüpmüsehko; arühnü ihrü münyodhingko ko müthsamünyüko.

⁵ Abüdongba, Nühnü ihrü te lede nengdang zichüronung mah-o? Nü zichüroba tsü michang kyo mütozah trunung mah-o?

⁶ Nü zichüroba tsü Nüh mümübüba yochoti michah, Nüte müdangkhidangnangba nyitsarü michah lieng.

⁷ Tunüo arühnü Nü nyitsarüti kyüsehko; arühnü Nü limih thsangnyangjüko.

⁸ Ihrü jümürü münyi ngang ihrü tükhingchi. Ihrü te ade yanglilüm; Ihrü alongdi apüm changpehko.

⁹ Ihrü troung, O Tsingrang, ko ihrü khümchoung; Nü neng khyanglangnü ihrü iichoung ko ihrü mülang pehjüng.

¹⁰ Tuepü yochotinü ihrü te, “Nührü Tsingrang khüde liro” pü tsingdhingsohnung? Nü dikehrüti shüh threhcho ngang yuchoti khingchicho ihrü khyang ngusohng.

¹¹ Arangyohrü rühchicho nyidhing, ko asünung mülangjüpü lirüti tsü Nü ziinü lehchehjüng.

¹² Abüdongba, Nü nyüpmüsehba yuchoti khyang dhünyehpinü alaa jüng.

¹³ Hütsüde, ihrü Nü nyitsarü, Nü san nyahrütinü müchangkapü Nü khyang nengse jünung ko aronung shang apüm la Nüh senung.