NENGSEKHI 77 - AMÜSA BAIBEL (BSI)

Alongrila Atbachi

¹ Ihnü Tsingrangba te zi züdecho; Ihnü zi züdecho, ko Abinü yuva yuchicho.

² Dhsangthsi shikhela Ihnü Abüdongba te kihchicho; müyüp Ihnü I kheh dhimüsu dangkhidangnangcho, ta atbachi müngucho.

³ Ihnü Tsingrangba nengdang lümdhingde, Ih rühchicho; Ihnü lümdhingde, I suzahpehcho.

⁴ Abinü müyüp Ih lümkangsohre; Ih khura lümtpanachonü yu müchochehre.

⁵ Atsicho nyümongti nengdang Ihnü lümdhingre ko atsicho kangti lümchehre.

⁶ Ihnü aromang soh lümdhingre, Ihnü lümdhingde Ipu te hita tsingdhingre:

⁷ “Abüdongba-nü lede Ihsa pehjünung mah-o? Adelü Abinü Ihsa te thali mükünyangnung mah-o?

⁸ Abinü Ihsa müikacho mah-o? Abi anyengchocho thümcho mah-o?

⁹ Tsingrangba-nü yanglilümnung nbüchücho mah-o? Abi achomang tsü zichürobanü mülicho mah-o?”

¹⁰ Hütsüde Ihnü yocho, “Tsingrangba adelü tase mühlepü yoba tsünü Ih alaa wahre.”

¹¹ Abüdongba, Nü nguchi amülah Ihnü lümchehnung; Nühnü atsichola anyemüyangnung nguchicho Ihnü lümkehnung.

¹² Nühnü nguchicho apüm shulüm Ihnü lümnung; Nü akohba nguchi apüm nengdang Ihnü lümdhingnung.

¹³ O Tsingrang, Nühnü nguchicho apüm Amüsa. Nü toh-i tsingrang apa mühle.

¹⁴ Nüh thsayahiya nguchiba Tsingrang; yanglihti yola Nühnü Nü tase ngusohcho.

¹⁵ Nü ziinü Nühnü Jakob ko Josef-rü trah, Nü müyurü khümchoko.

¹⁶ O Tsingrang, khode kihnü Nüh ngucho, arühnü drücho, ko kihdi asohnü dhridhricho.

¹⁷ Nyükhinü tsing rosohcho; ning chahnü ningkicho, ko mükangmüla ningmülacho.

¹⁸ Nüh ningki khong rachicho, ko ningmüla limih vicho; alihnü dhridhri shühchicho.

¹⁹ Nühnü kiloh khu tsehcho; Nühnü kihyü asoh kehcho, ta Nü jingdrang müngucho.

²⁰ Mosa ko Aron nyühnü müyurü nücho kyo, Nühnü Nü nyitsarü nücho.