NENGSEKHI 76 - AMÜSA BAIBEL (BSI)

Tsingrangba tsü Akohbong

¹ Juda la Tsingrangba müdheba lile; Israel la Abi neng dhichire.

² Abi kuh Jerusalem la lile; Abi Zion Khang chah lire.

³ Hütsüla Abi rorüh tbüdeng khyahnahjücho, arüh tsung, nohsheng ko arüh thsunohrü apüm thsangnyangjücho.

⁴ Nüh khüta ahechi, O Tsingrang! Azonglangnü Nü rorüti kohpü thalide, Nüh khüta hechiro.

⁵ Athrungrüti arüh licho apüm changko, ko arüh ade yüpsehpeko; arüh re ko asithsa apüm akhyüchah mühle.

⁶ Nühnü arüh mütichide, O Jakob Tsingrang, kuriti ko hütsü chah pümrü süre.

⁷ Ta Abüdongba, Nühlü atümungnü drüre, Nü zichürode Nüh amünyeh sünüsü müyacheh.

⁸ Nü yukhaba Nühnü ninglangnü müdhesohre;

⁹ limih chah Nü nyüpmüsehrü khümchonung Nü yukhaba sobhonung yade, limihnü drücho ko sahmüthsa licho.

¹⁰ Nyitsarü zichürocho tsü alaa Nü neng du sesohre; rothsala tsichehrütinü Nüh mübü thsüti müzehnung.

¹¹ Abüdongba nü Tsingrang khyang nü anyengchocho jüng shündhün liba yanglihtinü Abi khyang jiyü hirung. Tsingrangba-nü nyitsarü khyang Abi drüsohre;

¹² Abinü amüthseh yangthsarü longlümsohre ko yangthsarüti drümüyangsohre.