NENGSEKHI 75 - AMÜSA BAIBEL (BSI)

Yukhabong Tsingrang

¹ Ihrünü Nü khyang anengse jüre, O Tsingrang, ihrünü Nü khyang anengse jüre! Nüh khütoh-i amülah ko Nü anyemüyangnung nguchiti nengdang ihrünü sobhore.

² Tsingrangba-nü yore, “Yukhanung nyümong khüdu throchehko, ko yuje la Ihnü yukhanung.

³ Akang liba kanglungrü apüm dhridhrinye ko alih abükyü mii shühchinye, Ihnü amüdongkehji drengdreng yohpünung.

⁴ Ihnü amütsarü te mümülahmüshinung yore;

⁵ arüh tüzümükhüm zahnung yore.”

⁶ Yukhaba tsü nyüchüro mahkhang nyüzüdu, kihku lahpi mahkhang kihjing lahpi langnü mürore;

⁷ ta hütsü Tsingrangba-nü khürü, mülangjü ko khürü langjü yukhare.

⁸ Abüdongba kheh la shing khüdu Abi rihlong yongkha azinü jengpü bile. Abinü hütsü tungchore, ko amütsarü atümungnü hütsü yongre; arühnü hütsü müdrichi yongre.

⁹ Ta Ihnü Jakob Tsingrang nengdang choba mahkhang Abi nengsekhi thsaba khodesü müzahnung.

¹⁰ Abinü amütsarü tase thsangnyangjünung, ta Amüsarü zii alaa zikehnung.