NENGSEKHI 72 - AMÜSA BAIBEL (BSI)

Yangthsaba Shulüm Dangkhidangnang

¹ O Tsingrang, Nüh Amüsabala yukhanung yangthsaba te doung; Abinü Nü müyurü michah yuje yangthsanung,

² ko nyüpmüsehrü Amüsabala shüptinungthsa abi te Nü yuje changtaang.

³ Limih la pungrohiro lisohng; abinü Amüsaba tsüpsohng.

⁴ Yangthsabanü ailümrü yu athsalangnü khasohng; abinü chongcharü trosohng ko nyüpmüsehrü ashah khyüsohng.

⁵ Aronung shang apüm la nyünü dhsade, chonunü atsingse jüde Nü müyurünü Nüh mübüsohng.

⁶ Yangthsaba tsü Alih la yingkih longcho kyo, ko luh la tsing rocho roh-i lisohng.

⁷ Abi akanglila Amüsaba thangchisohng, ko chonunü vide abi pungrohirosohng.

⁸ Abi yanglih kihdi khüdu lanü khüdu chii, Eufrates lanü alih changka chii linung.

⁹ Lipilih la lirütinü abi jingte mükhukehnung; Abi rorütinü lihwü müyahnung.

¹⁰ Spain ko mütro la yangthsarütinü abi khyang jiyü jünung; Arabia ko Ethiopia yangthsarütinü abi khyang amübü hirojünung.

¹¹ Yangthsarü atümungnü ajingte mükhukehnung; Yuchoti apümnü abi dikehnung.

¹² Abinü abi te züderü ailümrü, achongcharü ko arotorüti khümchore.

¹³ Sumüzehrü ko ailümrü te abinü chomangre; ko müdsimükurü abinü khümchore.

¹⁴ Abinü arüh nyüpmüseh ko shühkhatoh lanü khümchore; arüh akang abi jingte thsidi lile.

¹⁵ Yangthsaba kutsüp lisohng! Abi khyang Arabia lanü hon jüsohng; Abi nengdang shikhe apüm la dangkhidangnangjüng; Abi te Tsingrangba amüwa lede lisohng!

¹⁶ Limih la fürü bholo lisohng; Lebanon la kyo azongti tsü tsahmanü chitisohng. Zanunü chitiba alih kyo, yangditi tsü nyitsarünü jengsohng.

¹⁷ Yangthsaba neng tsü khodesü tünbüchüsoh; nyü kyo abi nengse lede lisohng. Yuchoti apümnü abi sesohng, Arüh müwasohnung Tsingrangba te kihchisohng ko yangthsaba nengdang arühnü tsa lümsohng.

¹⁸ Israel Tsingrang Abüdongba seing! Abi dunü hiri anyemüyangnungti nguchire.

¹⁹ Abi ahechi neng achangka müli seing. Abi ahechinü limih apüm jengsohng. Amen! Amen!

²⁰ Hiba hi Jesse tsurü David dangkhidangnang achangka.