NENGSEKHI 71 - AMÜSA BAIBEL (BSI)

Ashirü Khüdu Dangkhidangnang

¹ Abüdongba, Nü chah Ih tsikehre; Ih khodesü ashah tükhyüsoh!

² Nüh Amüsabala Ih troung ko khümchoung. Iyu nyijüng, ko Ih khümchoung!

³ Nüh I tsikehchah lung thsaang, ko Ih tsungtinung akhümkhüm roshengvi; tunüo Nüh I tsikehsing ko roshengvi.

⁴ O Tsingrang, amütsarü, yuje müchorü, ko akhürahrü khehlanü Ih khümchoung.

⁵ Amichah-uba Abüdongba, Nü chah Ihnü longdire; I za denü Ihnü Nü chah yudsire.

⁶ Nü chah I kang ayung ngakehre; I suro nyümong tinü Nühnü Ih tsungtiko. Ihnü lede Nüh senung.

⁷ Bürü nengdang I kang adüzüthsa roko, ta Nüh I tsikehsing akhümkhüm.

⁸ Nyümong ayung Ihnü Nüh sere ko Nü ahechi sobhore.

⁹ Ashilang Nühnü Ih tüthrüchahchübeh; Re müzeh rode Nühnü Ih layü tüpehjü.

¹⁰ I rorütinü I kang khyünyüre; arühnü chota Ih nyüm rah külüpre.

¹¹ Arühnü yore, “Tsingrangba-nü abi thrüchahchüpehko; Ihsanü abi khanglang wünung ko abi rangnung; abi rerechorü süsü mühle.”

¹² O Tsingrang, shura wü tüli; I Tsingrang, Ih tronung dhsüdhsang!

¹³ I berüti tsü kohjüng ko changjüng. I lerohpehjünung müküprüti tsü ashah khyüsohng ko wahsohng.

¹⁴ Ihnü lede Nü chah I alongdi yohpünung; Ihnü alaa alaa Nüh senung.

¹⁵ Ihnü Nü tsacho nengdang yonung; Nü akangcheh Ihnü nyichehnung mükohnye, Ihnü nyümong ayung chonung.

¹⁶ Ihnü Nü zii senung, Akohba Tsingrang; Ihnü Nü Amüsaba, nengdang du sobhonung.

¹⁷ I zadenü Nühnü Ite doko, ko Ihnü adesü Nü anyemüyang nguchi shulüm yore.

¹⁸ Adelü Ih shiko ko kutpoh chüroko, Ih tüpehjü, O Tsingrang! Ihnü aronung shang te Nü suhre ko zii sobhode Nüh Ite lieng.

¹⁹ O Tsingrang, Nü Amüsabanü ning chihko. Nühnü nguchi arangcheh nguchiko; Nüh kyo süsü mühle.

²⁰ Nühnü Ih yang dhsangthsi ko chongcha müthehko, ta Nühnü I khyang suhre jünung; Nühnü thali Ih khamüsunung.

²¹ Nühnü Ih akhudi tenü adiu kangsohnung; Nühnü thali Ih tbachisohnung.

²² Ihnü yuje tbenglah tii Nüh senung; Ihnü Nü yuje nengdang senung, I Tsingrang. I tbenglah la Ihnü Nüte mübü khi thsanung, Israelrü Amüsaba.

²³ Nü nengdang khi thsade, Ihnü akünyangnü züdenung; I kang apümshünü khi thsanung, tunüo Nühnü Ih khümchoko.

²⁴ Ihnü nyümong ayung Nü Amüsaba nengdang chonung, tunüo Ih dhsakehjünung müküprüti Nühnü ashah khyüsohko ko wahsohko.