NENGSEKHI 69 - AMÜSA BAIBEL (BSI)

Atronung Züdecho

¹ Ih khümchoung, O Tsingrang! Kihnü I hong chihko;

² Ih chongbong asoh la dhrümyoh lile, ayonglang lihrü mühle Ih kih asoh la züropehko, ko kihlohnü Ih mülümtile.

³ Züdechonü Ih kyahpehko, I linga kungpehko. I Tsingrang yingde, I nahtse chürore.

⁴ Yuzi mülipü I thrünyirüti I thah chah I kuva tenü adrongu lile. I rorütinü Ih nyüm arahkheh chore; arüh re azeh ko Ih müpsehnyüre. Ihnü müfühcho kohro arühnü I khyang sahsohcho.

⁵ O Tsingrang, I münyi Nü tenü rang mühle; Ih khütoh-i dohchonang Nühnü müdhele.

⁶ Ih khu Nü chah yudsirü ashah tükhyüsoh. O Amichahba, Akohba Abüdongba. Ih khu Nüh mübürü khyang ashah tühirosoh, O Israel Tsingrang!

⁷ Nü khyanglangnü Ih nyüpmüsehsohcho ko ashahnü I romih hapticho.

⁸ Jünirüti te Ih shirü khüdu kyo, kukhirü te shupa khüdu kyo kangko.

⁹ Nü Amübükuh mükhyahchonü michangnü roh-i trüpnahre; Nü nyüpmüsehba tsü I chah kürore.

¹⁰ Ihnü kongnü I jangjang longlüm kangre, ko nyitsarünü Ih nyüpmüsehre;

¹¹ Ihnü I jangjang meshü jengki khyüre, ko arühnü Ih münyodhingre.

¹² Arühnü yanglongla I nengdang chore, ko amücharünü I neng dangchi khi thsare.

¹³ Ta, Ihnülü Nüte kihchinung, Abüdongba; Nü bekhyah tsade laling, Tsingrangba. Nü amüthrehba amüi aichi Ite laling, tunüo khümchonung Nühnü anyengchoba yohpüre.

¹⁴ Chongbongla dhrümyohnung lanü Ih khümchoung; I rorüh khehlanü Ih khümchoung, kih asoh lanü khümchonung.

¹⁵ Kihmülüm I michah türosoh; Ih yongroh la tüthungyohsoh mahkhang kong la tüzüdusoh.

¹⁶ Abüdongba, Nü amüthrehba amüila Ite laling; Nü amüila I yanglang ximülaang!

¹⁷ Nü dikehrü tenü türang; Ih dhsangthsi arangchehla lile, ade Ite laling.

¹⁸ Ih yang rung ko Ih khümchoung; I rorüh khehlanü Ih iichoung.

¹⁹ Ih khüta nyüpmüsehro ko mükhimücho wahsohro Nühnü müdhele; Nühnü I rorüti atümung ngule.

²⁰ Nyüpmüsehchonü I lasih thsangnyangko, ko Ih alongyüla lile. I nengdang amüi yangchicho, ta müngucho; tbachijürü dhingchicho, ta süsü müngucho.

²¹ Ih yangde, I khyang müyüh tüpcho; Ih xode, arühnü acikih tihcho.

²² Arüh thsüti tsü athsangnyang kangsohng; arüh Amüsa thsüti tsünü arüh khülusohng.

²³ Arüh nahtohsohng! Arüh rung lede dhsasohng!

²⁴ Arüh te Nü rihlong chürung; Nü zichürobanü arüh iiphüng.

²⁵ Arüh alichah tsü kuhpeh kangsoh; arüh kuh la süsü akang tüpehjü.

²⁶ Nühnü khingchirüti arühnü dhsümthsere; Nühnü lerohpehjürü chongcha nengdang arühnü chocho.

²⁷ Arüh münyi apüm thrahyohpüng; Nü akangchehla arüh khyang nohlüm tu tükhyüsoh.

²⁸ Akang vakha lanü arüh neng threhtieng; Nü nyitsarü yola arüh neng tüzehsoh.

²⁹ Ta Ih alongri ko adhsa la lile; Ih wüpkehchüng, O Tsingrang, ko Ih khümchoung!

³⁰ Ihnü khi khüdunü Tsingrangba senung; Ihnü anengsejo Abi dicho sobhonung.

³¹ Hinü misü jo mübücho tenü, ko misüpung azichonü kangmübü jücho tenü Abüdongba alaa künyangnung.

³² Roto lirünü hi ngude, arühnü künyangnung; Tsingrangba mübürü alaa rezehnung.

³³ Abüdongba-nü müdsimükurü te nyire ko arangyoh la lirü anyitsarüti münbüchüre.

³⁴ Tsingrangba seing, O ning ko alih, kihdi ko hütsüla liba akang apüm.

³⁵ Abinü Jerusalem khümchonung ko Juda yangditi külüpchinung. Abi nyitsarü hütsüla linung ko alih tsü khyünung;

³⁶ Abi kulirü tsurütinü hütsü thsiking ngunung, ko Abi müirüti hütsüla linung.