NENGSEKHI 68 - AMÜSA BAIBEL (BSI)

Yanglih Akoh Khi

¹ Tsingrangba shemüsure ko arorühti tsishosohre. Abi thrünyirüti amükoh ngu drü tsire.

² Mikhu fotsicho kyo Abinü arüh iipehre; michang te xa zünahcho kyo, Tsingrangba jingte amütsarü changre.

³ Ta Amüsarü Abi jingte künyangre ko longphitare; arüh künyangre ko akünyangnü züdere.

⁴ Tsingrangba te khi thsaang, Abi nengla nengsekhi thsaang; nyükhi michah pümba khyang lang khüdu rungnümjüng. Abi neng Abüdongba, Abi lichola künyangtaang.

⁵ Tsingrangba, sü Abi Amüsa Amübükuh la liro, Abinü mürürü xükümre ko chomilarü tsungtire.

⁶ Mürümürangrü khyang alinung kuh jüre; ko akhangtila lirü yuje akünyang yang nüchehre, ta anyümrü akungase la lisohnung.

⁷ O Tsingrang, Nühnü Nü müyurüti nonü, lipilih khu tside,

⁸ alih shüchicho, ningnü tsing rosohcho, hütsü Sinai Tsingrang, ko Israel Tsingrang rocho khu lile.

⁹ Nühnü tsing bholo rosohcho ko akungchehcho lih asu lih kangsohcho;

¹⁰ Nü nyitsarünü hütsüla arüh kuh thsacho; Nüh tsachonü ailümrü khyang chixicho.

¹¹ Abüdongba-nü yuzengjücho ko khingkurü adrongnü yusi tsü hicho:

¹² “Yangthsarü ko arüh athrungrüti rang tsile!” Kuh la khingkurütinü arohchocho changnahre:

¹³ Mümüdhrü kyothri taripinü thripü, hon aririnü aqo külüp lile. (Tuepü rothsa nyümong nührü khürülü san kuh la pümro?)

¹⁴ Akohba Tsingrangba-nü yangthsarüti Zalmon zong la tsishojüde, Abinü hütsüla müdhrang sühsohcho.

¹⁵ Zong müjoh khütang zehba Bashan zong hi khüta arangcheh!

¹⁶ Tuepü Tsingrangba linung throcho khang chah azong müjoh lanü müthsamünyü dhingchahchüro? Abüdongba hütsüla müchangka linung!

¹⁷ Abi khata akhüluba hajar adrong te, Sinai lanü Amüsa yangdi yang Abüdongba rore.

¹⁸ Abinü azonglang arangyohrü khütang nüpü tuwüre; Abinü anyümrü khehlanü jiyü khyüchore. Abüdongba Tsingrang hütsüla linung.

¹⁹ Abüdongba seing, sünü nyümong mükhu Ihsa bhamüling hijüro; Abi Ihsa khümchobong Tsingrang.

²⁰ Ihsa Tsingrang tsü khümchobong Tsingrang; Abi tsü Abüdongba, asü lanü khümchobong, Ihsa Abüdongba.

²¹ Tsingrangba-nü Abi rorüti sürünü arüh münyi langla du tsehnyüro, arüh thah kengrüpjünung.

²² Abüdongba-nü yocho, “Ihnü Bashan lanü nührü rorüh nüli ronung; Ihnü kihjü asoh lanü arüh nüli ronung,

²³ ko nührünü arüh shüh la dhrümchinung, ko nührü füzanü arüh longnyüp müyahnung.”

²⁴ O Tsingrang, Nüh akoh ngu yanglong tungcho, I yangthsaba, Tsingrangba yanglongdse, Abi Amüsa kuh la züducho atümungnü nguko.

²⁵ Khithsarü akhu, ikhong tiirü akhanglang, ko alongla khingkuzarüti tambourin tiinü tsehcho.

²⁶ “Müyurüti shimükhongchola Tsingrangba seing; Abüdongba seing, nührü Jakob chahnü trahchochoti!”

²⁷ Akhudi Benjamin hung azauba, Hütsü khangte Juda langnürüti ko arüh mülung, hütsü khangte Zebulun ko Naftali langnürüti.

²⁸ O Tsingrang, yangthsarünü Nü khyang jiyü hirochah

²⁹ Jerusalem Amübükuh la Nühnü ihrü nengla ngusohba Nü zii tsü ngusohng.

³⁰ Thoh yola rangmü kanglungrü Ijip tsü yübüng; arühnü mükhukeh arüh taripinü Nüh mümübüde, misüpung atii aza nüba yuchoti tsü yübüng. Chita mürurüti tsishosohng!

³¹ Yanglih langbürü Ijip lanü ronung; Sudan-rünü Tsingrangba te kheh dhimüsu dangkhidangnangnung.

³² Tsingrangba te khi thsaang, limih yanglihti,

³³ jümü ning, ningchah tsehchiba, Abüdongba te nengsekhi thsaang. Züde khong Abi te nyieng.

³⁴ Tsingrangba zii sobhoung; Abi ahechi Israel michah lile, Abi Akohba ningchah lile.

³⁵ Israel Tsingrang, Abi Amüsaba kuh lanü rode, khüta adrünung. Abinü Abi müyurüti khyang tase ko zii jüre. Tsingrangba seing!