NENGSEKHI 66 - AMÜSA BAIBEL (BSI)

Nengse Jüba Khi

¹ Nyitsarü atümungnü akünyangnü züde Tsingrangba seing!

² Abi neng ahechi khi thsaang; ahechi nengse Abi khyang jüng!

³ “Nü nguchiti khüta anyemüyangnung pü Tsingrangba te young! Nü zii dirachonü Nü rorütinü dhridhri Nü jingte mükhukehre.

⁴ Limih chah lirü atümungnü Nüh mübünung; arühnü Nüte nengsekhi thsanung, arühnü Nü nengsekhi thsanung.”

⁵ Rung ko Tsingrangba nguchiti dhing, nyitsarü yola Abi anyemüyangnung nguchiti dhing.

⁶ Abinü kihdi alih akung kangsohcho; Ihsa jümürünü jingnü yongkhi tsü kehcho. Hütsüla Abinü nguchichola Ihsanü künyangtacho.

⁷ Abinü müchangkapü Abi renü yangthsare, ko yuchoti michah Abinü dhingyehre. Abi nyümrü tüchürosoh.

⁸ Yucho atümungnü Ihsa Tsingrang seing; nührünü secho yuchisohng.

⁹ Abinü Ihsa akang yohpüjücho ko Ihsa mükhülusohcho.

¹⁰ Nühnü ihrü thsadsüko, O Tsingrang; michangnü taripi müchehdhingcho kyo, Nühnü ihrü thsadsüdhingko.

¹¹ Nühnü zeng la ihrü dhrümrangsohcho, ko ihrü rung chah bha amüling dhikehjücho.

¹² Arorüh khyang ihrü michah dhrümchisohcho; ihrünü michang ko kihmülüm khu wücho, ta ade Nühnü ihrü akyahshang lih la noroko.

¹³ Ihnü trüp mübü Nü kuh yang hironung; Ihnü Nü khyang anyengchocho mübünung.

¹⁴ Ih dhsangthsila lide jünung nyengchocho; Ihnü Nü khyang jünung.

¹⁵ Bholu chah trüpnung san Ihnü mübünung; Ihnü misüpung ko mizati kangmübü jünung, ko mikhu tsü ning chii küdunung.

¹⁶ Nührü Tsingrangba drürü atümung rung ko nyieng, ko Abinü Ite tu nguchicho yonung.

¹⁷ Ihnü arüku nengdang Abi te züdecho; Ihnü khi khu Abi secho.

¹⁸ Ihnü I münyi rangpülanglü, Abüdongba-nü Ite mühnyiba thsako.

¹⁹ Ta Tsingrangba-nü Ite yuje nyiko; I dangkhidangnang Abinü yuchiko.

²⁰ Ihnü Tsingrangba sere, tunüo Abinü I dangkhidangnang müdhsongli, mahkhang Abi amüthrehba amüi mükhyümüi.