NENGSEKHI 65 - AMÜSA BAIBEL (BSI)

Anengse ko Nengsejüba

¹ O Tsingrang, Zion la Nüh senung ko Nüte yuchüm yohpünung,

² tunüo Nühnü akihchicho lalingre. Apümlangnü nyitsarü arüh münyi nengdang Nüh yang ronung.

³ Ihrü thsamehchonü ihrü kohre, ta Nühnü mülang pehjüre.

⁴ Nü Amüsa kuh la linung sürü norocho ko throchehcho arüh akünyangnung. Nü kuh la liba atsa ko Nü Amüsa Amübükuh amüwanung tsünü ihrü longkyangnung.

⁵ Ihrü khyang akohba jonü ihrü te Nühnü lalingre, ko ihrü khümchonung Nühnü anyemüyangnung nguchi nguchire. Liküp müyurüti ko kihdi khu wü lirünü Nü chah longlangre.

⁶ Nü tase ko Nü zii arangcheh ngusohnung azongti Nühnü yohpüre.

⁷ Nühnü kihdi khongcho ko kiloh khongcho yuva zahsohre; Müyurüti rongrongcho Nühnü kihchore.

⁸ Liküpnü Nü nguchicho arangcheh drüre. Nü nguchinü limih jongnah, khüulangnü khüulang chii akünyang yuva züdere.

⁹ Nühnü tsing rosohnü alimih xükümcho ngusohre; Nühnü hütsü thangchi asu kangsohre. Nühnü yongkhi kihnü jengsohre; alih khyang tsahma jüre. Nühnü hütsüta nguchire.

¹⁰ Junah yohpüba alih khyang tsing kükyo rosohre ko hütsü dhsangnahsohre; tsing tsünü alih tsü lulusohre ko tsahmarü chisohre.

¹¹ Nühnü khütoi pungrohirosohro! Nü wücho apümlang thangchi lile.

¹² Zanulih tsü santinü jeng lile; azongti tsü akünyangnü jeng lile.

¹³ Mükyah tsü Santinü jeng lile; angah tsü lihtohnü jeng lile. Lüpchonü akünyangnü züde khi thsare.