NENGSEKHI 64 - AMÜSA BAIBEL (BSI)

Atsungtinung Kihchicho

¹ Ih adhsangthsi la lile, O Tsingrang, I dangkhidangnang nyijüng! I rorüti drüre, I kang khümchoung!

² Amütsarü rah ko amünyirü mülung lanü Ih tsungtieng.

³ Arüh müle nohsheng kyo zare ko tbüdeng roh-i akhürah yu miire.

⁴ Ashah mükeh arahkheh sobhonung arüh khütang adsaya; Besüseh yunü nyitsarü atsa mii thsangnyangjüre.

⁵ Amükhyu rah nengdang arüh thsüchitare, zeng khüde thsanung arühnü chungre. Arühnü yorü, “sünüsü arüh müngunung.”

⁶ Arühnü lümchung amütsa külüp-pü yorü, “Ihsanü arah tsa chungko.” Nyitsarü lasih ko lümlong tsü thrizie.

⁷ Ta Tsingrangba-nü arüh chah tbüdengnü kyare, ko dhrongyengnü arüh lerohpehre.

⁸ Hütsüri yu khu Abinü arüh changsohnung; arüh ngurü atümungnü arüh thah ngahnung.

⁹ Arüh atümungnü drünung; Tsingrangba-nü tu nguchicho hütsü nengdang lümdhingnung; ko Abi nguchi nengdang yonung.

¹⁰ Amüsarü atümungnü Abüdongba-nü nguchichola künyangnung. Arühnü Abi chah akhümcho ngunung; Nyitsarü atsa atümungnü Abi senung.