NENGSEKHI 63 - AMÜSA BAIBEL (BSI)

Tsingrangba Mükhyahcho

¹ O Tsingrang, Nüh I Tsingrang ko Ihnü Nüh mükhyahre. I kangshünü Nüh mükhyahre; Akungchehcho, athrehchehcho kih müliba alih kyo, I nbünü Nüh xore.

² I khyang Amüsa kuh la Nüh ngusohng; Nüh khütoh-i Akohba ko ahechinang Ite ngusohng.

³ Nü amüthrehba amüi tsü akang tenü awüba, hütsünü Ihnü Nüh sere.

⁴ I kangli ayung Nü khyang anengse jünung; Ihnü I kheh dhimüsu dangkhidangnangnung.

⁵ I nbü künyangnung ko longnyüpnung, ko Ihnü akünyang khi thsanü Nüh senung.

⁶ Chongnong chah yüpjode, Nüh lümchehre: müyüp Ihnü Nüh lümchire,

⁷ tunüo lede Nüh I trorü licho. Nü qo khümki Ihnü akünyang khi thsacho.

⁸ Ih Nü chah tbhakehre, ko Nü khehnü Ih khümre.

⁹ Sürünü Ih müpsehnung müküpro arüh asülih yang züdunung.

¹⁰ Arüh khatala müpsehnung ko arüh me rangfünü tsunung.

¹¹ Tsingrangba-nü abi khyang kohsohchonü yangthsabanü künyangnung. Tsingrangba nengla yuchümrü atümungnü Abi senung, ta arahkhehrü be khangtijünung.