NENGSEKHI 62 - AMÜSA BAIBEL (BSI)

Tsingrangba Atsungtibala Longlangba

¹ Ih khümchosohnung rangcho Ihnü Tsingrangba yingre; Abi chah du Ih dümpire.

² Abi dunü Ih tsungtire ko khümchore; Abi I khümrü, ko arühnü khodesü Ih mükohnung.

³ Atrümtsucho tbü tenü asütpah-u nyüh khüdu nührü atümungnü khütoi nyahli benung?

⁴ Nührünü abi adhichi jingkih lanü jowüsohnung du khyünyüre; nührünü arahkheh la du künyangtare. Nührünü amüwa yu chore, ta lasih lalü chokehcholare.

⁵ Ihnü Tsingrangba chah du dümpire; Abi chah I longdi yohpüre;

⁶ Abi dunü Ih tsungtire ko khümchore; Abi I khümrü, ko arühnü khodesü Ih mükohnung.

⁷ I akangcheh ko adhichi Tsingrangba chah du kehle; Abi I tsungtirü adiu; Abi I tsikehji.

⁸ Müyurüti, lede Tsingrangba chah longdieng. Nü dhsangthsi apüm Abi te young, tunüo Abi Ihsa tsikehji.

⁹ Nyitsarü atümung asah khüdu du amülah ko azikyah anyüding amii mühle. Ahosing la arüh hore ta müking; arüh asah tenüsü aringringba.

¹⁰ Shüh khatohbala tülongdi; rohchochonü jingchonung tu tülongdi; nüh alaa li kangnye, hütsü chah tülongdi.

¹¹ Zii tsü Abi yo ko Abi amüi tsü amüthrehba lede lirepü Tsingrangba-nü loli yocho Ihnü yuchiko.

¹² O Abüdongba; Nüpunü nyitsarü müipi palu nguchi aichi müwajüre.