NENGSEKHI 59 - AMÜSA BAIBEL (BSI)

Akhümcho nengdang Kihchicho

¹ I rorüh khehlanü Ih khümchoung, I Tsingrang; I betirü chahnü Ih tsungtieng!

² Amütsarü khehlanü Ih khümchoung; müpsehrü khehlanü Ih rerechoung!

³ Dhing! Arühnü Ih müpsehnung yingle; akhürahrüti Ih nyüm shibülungle; I münyi ko thsamehcho ngang mah, O Abüdongba,

⁴ I chah tu mülang mülipü arühnü tsokhuta Ih bere. Shemüsung, I tronung rung, ko dhing!

⁵ Nüh, Abüdongba Akohba, Israel Tsingrang. Surung ko yanglihti khingching; Amütsa lüm thsüyohchürü te yanglilüm tüngu.

⁶ Arühnü anyüzehlang thali rore, arühnü yangdila tsü füza kyo reng rachire.

⁷ Arühnü nyüpmüseh ko thsüyohchücho yu tsü nyidhing. Arüh bela arüh müle tsü nohsheng kyole, ta sünüsü müyuchi pü arühnü lümre.

⁸ Ta Nühnü arüh münyodhingre, Abüdongba; Nühnü müyudsirü atümung müthsamünyüre.

⁹ Nü re la I longlangre; Nüh I tsikehchah, O Tsingrang.

¹⁰ I Tsingrang-nü Ih müire ko Ih yang ronung; I rorüti kohchehcho Abinü I khyang ngusohnung.

¹¹ Arüh tümüpseh, O Tsingrang, mahkhang I nyitsarütinü nbüchünung. Nü renü arüh kohpü tsishosohng, O Abüdongba, ihrü tsungtibong.

¹² Arüh beküp la amünyi lile; arüh yu apüm amünyi du; arüh müthseh la arüh rangsohng! Tunüo arühnü chokehcholare ko rahkhehre,

¹³ Nü zichüro arüh changjüng; arüh riri changjüng. Alimih achangchinü Tsingrangba-nü Israel la yangthsarepü nyitsarü atümungnü müdhenung.

¹⁴ I rorüti anyüzehlang thali rore. Arühnü yangdi lang füza kyo reng rachire.

¹⁵ Füzanü tsang yangchi rachipü mi müjengkhang rengcho kyole.

¹⁶ Ta Ihlü Nü tase nengdang khi thsanung; Nüh amüthrehba amüi nengdang nyangnyü mükhu Ihnü züde khi thsanung. Nüh I tsikeh chah thsacho, Ih dhsangthside tsikehsing.

¹⁷ Ihnü Nüh senung, I khümrü. I tsikehsing tsü Tsingrangba, Tsingrangba sünü Ih müiro.