NENGSEKHI 58 - AMÜSA BAIBEL (BSI)

Amütsarü Khingchisohnung Kihchicho

¹ Nührü yangthsarütinü yuje yukha müjüdhingo? Nührünü atümung yu athsalangnü kharü mah-o?

² Mah! Nührü lasih la amütsa du nguchinung lümre, ko nü khehnü limih la shühkhatohba nguchire.

³ Amütsarünü akang ayung thsamehre; asurodenü arahkheh chomüsure.

⁴ Mürü kyo arüh müyühnü jeng lile; anangtbeng wongmürü kyo arüh nangkhi thsitire,

⁵ hütsünü mürü müshürü mahkhang, arahmütsa amongrü yuva müyuchire.

⁶ O Tsingrang, hiri adrünung kihkhünying aha tümpehjüng.

⁷ Kih nümülacho kyo arüh changsohng; langla za kyo arüh sehnahsohng.

⁸ Arüh shünganyilong kyo shenahsohng; Asücho akhunga suroba atsingse müngudhingcho kyo arüh kangsohng.

⁹ Arühnü mümüdhe-enü, za kyo arüh kyüsahre. Tsingrangba-nü arihlong chüro arüh akang linü arüh mehpehnung.

¹⁰ Münyirüti khingchicho ngude Amüsarü künyangnung; amütsarü shüh la arüh jing thsütohnung.

¹¹ Nyitsarünü yonung, “Amüsarü yuje jiyüko; Yuje limih yukhabong Tsingrangba khüdu lile.”