NENGSEKHI 57 - AMÜSA BAIBEL (BSI)

Arüku nengdang Kihchicho

¹ Ite chomang. O Tsingrang Ite chomang, tunüo khümchosohnung Ih Nüh yang rore. Tsingxinyübong khukhang mütside Nü qo pohki Ih tsikehnung.

² Amichahba Tsingrang, sünü I dhsütah apüm chixiro, Ihnü Abi te züdenung.

³ Abinü ninglangnü laling Ih khümchonung; Abinü I khingchirü kohnung. Tsingrangba-nü Abi amüthrehba amüi ko longlangchehba Ite ngusohnung.

⁴ Nyitsarü tsuba kihkhünying kyorü I rorütinü Ih mükangtiko. Arüh aha tsü thsuh ko tbüdeng kyole; arüh müle nohsheng akoh kyole.

⁵ O Tsingrang, ningchah Nü mülahcho ko alimih chah Nü ahechi ngusohng.

⁶ I rorünü Ih xohnung zeng thsapüjüle; Ih awahnü jeng lile. Arühnü I langla mütrüm jucho, ta hütsüla arühbürü du dhrümyohcho.

⁷ O Tsingrang, Nü chah khütang longlangre; Ihnü khi thsa Nüh senung!

⁸ Surung, I nbü! Surung, O tbenglah ko honglilah! Ihnü nyü khamüsunung.

⁹ O Abüdongba, Ihnü müyurüti yola Nüh senung. Ihnü yanglihti yola Nüh senung.

¹⁰ Nü amüthrehba amüinü ninglanglih chihre; Nüh yuje chobanü ning thahpüre.

¹¹ O Tsingrang, ningchah Nü mülahcho, Nü ahechi alimih chah ngusohng.