NENGSEKHI 56 - AMÜSA BAIBEL (BSI)

Tsingrangba Chah Longlangnung Kihchicho

¹ Ite chomang, O Tsingrang, tunüo Ih beti lile; I münyehrütinü lede Ih dhsümthsere.

² I münyehrütinü mükhyang Ih betire. Ih nyüm khatarü khütango lile.

³ O Akohba Tsingrang, Ih drüde, Nü chah Ihnü longlangre.

⁴ Ihnü Tsingrangba chah longlangre ko Ih müdrüre; Abi anyengchoba shulüm Ihnü Abi sere. Shutsa nyitsarünü Ite tu nguchichehnung?

⁵ Mükhyang I rorünü Ih dhsangthsisohre; lede arühnü Ih dhsakehjünung chungre!

⁶ Arühnü shibülungpü rang pümpü Ih müpsehnung I nguchicho apüm dhingyehre.

⁷ O Tsingrang, arüh münyi ngang arüh khingching; ko Nü rihlong chüro arüh kohng!

⁸ Ih khütoh-i dhsangthsiro Nühnü müdhele; Nühnü I nahshükih hiibongla yohpüng! Nü vakhala arüh müthrahyohcho do?

⁹ Ihnü Nüte dsi nyümong I rorüti shehli tsinung. Ihnü hi müdhele; Tsingrangba I lahpi lile.

¹⁰ Abüdongba anyengchochoti Ihnü sere.

¹¹ Abi chah Ihnü longlangre, Ihnü müdrünung. Shutsa nyitsarünü Ite tu nguchichehnung.

¹² O Tsingrang, Ihnü nyengchocho Nü khyang mübünung; Ihnü Nü khyang nengse jüba mübünung,

¹³ tunüo amükoh asülanü Nühnü Ih rerecho, ko amükoh lanü khümchocho. Hütsünü akang lirü chah heba atsingsela Ihnü Tsingrangba te tsehre.