NENGSEKHI 55 - AMÜSA BAIBEL (BSI)

Kihyochücho Nyitsarü Khüdu Akihchiba

¹ I dangkhidangnang nyijüng, O Tsingrang; I kihchicho tüpehjü!

² Ite nyieng ko laling; Alongrinü Ih kyahpehko.

³ I rorünü Ih jichichonü, amütsarünü Ih dhrümchichonü Ih drümüyangko. Arühnü adhsangthsi hirojüre; arüh zichüro Ih thrünyire.

⁴ Ih drümüyangko, ko asünung drübanü Ih niisehre.

⁵ Adrü ko adhridhrinü Ih yümsehpehko; adrünü Ih jengko.

⁶ Ih mümüdhrü roh-i aqo kehrelang, Ih mong tsinung ko akyahshang ngunung.

⁷ Ih ashu mong tsinung ko lipilih la I kuh külüpnung.

⁸ Tsingxinyübong amütsa lanü atsikehchah khüdu zah ngunung.

⁹ O Abüdongba, I rorüti lümdhamasohng. Ihnü yangdila shühkhatoh ko yubejarong,

¹⁰ hütsü mükang ama atsingse adhsangthsi ko athsangnyang ngure.

¹¹ Apümlang athsangnyang lile; yanglongla akhingchi ko akhürahnü jeng ngure.

¹² Arorüh khüdunü Ih münyüjürelang, Ihnü hütsü rangchonung; I michah anyümrü khüdunü tüzümükhümrelang, Ihnü abi tenü rangnung.

¹³ Ta hütsü nüh, I shangrü, müjang nguchirü ko shangrükhung.

¹⁴ Ihsa khütang shündhün chotacho ko amübükuh la müjang mübücho.

¹⁵ I rorüti akyang müchie süsohng; arüh akangnü asülihlang züdusohng. Arüh kukhi ko lasih la amünyi lile.

¹⁶ Ta Ihnü Abüdongba Tsingrang te dsire, ko Abinü Ih khümchonung.

¹⁷ Anyangnyü, nyüthung ko aromang I longmüsü ko rühchiba Abi yang küdure, ko Abinü I yuva yuchire.

¹⁸ I rorüh hütsütoi te chitalanü Abinü Ih khümcho nüli ronung.

¹⁹ Tsingrangba sü adikehdinü yangthsaro, Abinü Ite nyinung ko arüh kohjünung; tunüo arühnü mümülichinyüre, ko Abi müdrüre.

²⁰ I shangrü ahinü amüyangrüti becho; abinü anyengchocho thsangnyangcho.

²¹ Abi yu asu tenü ananau, ta alasih la nahmoh lile; abi yu tuji kyo anana, ta hütsünü nohsheng akohnü roh-i wasahre.

²² Nü dhsangthsi Abüdongba khyang pehjüng, ko Abinü nüh khümnung; Abinü yuje chorü khodesü mükohchehsohre.

²³ Ta O Tsingrang, Nühnü amüpsehrü ko arahkhehrü arüh akang achangsho mii mütsie kong yang noronung. Ta Ihlü Nü chah longlangnung.