NENGSEKHI 53 - AMÜSA BAIBEL (BSI)

Nyitsarü Mütsacho

¹ Adohrünü alasih la lümre, “Tsingrangba mühle.” Arüh atümung athsangnyang, ko arühnü adrünung nguchiko; atsa nguchirü süsü mühle.

² Amüi tsurü yola Tsingrangba yangchirü ko asithsarü khürü dusü mülinangpü, Tsingrangba-nü ninglangnü dhingchahchüre.

³ Ta arüh atümung amütsilang tsiko; arüh atümung amütsa. Atsa nguchirü süsü mühle, khüdusü mühle.

⁴ Tsingrangba-nü tsingre, “Arühnü mümüdhecho do? Amütsa nguchirü hiri atümung tuyah mümüdherü du do? I müyurü chahnü kengcho arüh akang lire, ko arühnü khodesü Ite müdangkhidangnangre.”

⁵ Ta hütsüde arüh chah khodesü mütikehdhingcho khüdunü drümüyangsohnung, tunüo Tsingrangba-nü Abi müyurü rorüh rühlungrü shupishuzasohnung. Tsingrangba-nü arüh mükhyücho, hütsünü Israelrünü arüh sehchi kohnung.

⁶ Zion lanü Israel khyang khüta akoh ronung Ihnü kihchire. Abüdongba-nü Israelrü thali müwajüde arüh khütoi künyangnung.