NENGSEKHI 51 - AMÜSA BAIBEL (BSI)

Mülang Pehjünung Kihchicho

¹ Ite yanglilüm, O Tsingrang, Nüh amüthrehba amüi shidüm. Nü yanglilüm amülahnü I münyiti nipehjüng!

² I münyiti apüm thsütohjüng ko I münyi lanü müsachehjüng!

³ I thsamehcho Ihnü müdhele; Ihnü lede I münyi lümkehle.

⁴ Ihnü Nüh nyüm, Nüh du nyüm, amünyi shitpahko, ko Nühnü amünyi khichiba Ihnü nguchiko. Hütsüeko Nühnü Iyu khanung tsü athsalang, Ih mülangjüba tsü Nüh athsalang.

⁵ Dhing, Ih amünyi la hirocho, ko amünyi la I tpanü Ih longla hicho.

⁶ Nühnü dhsütahba tsü müci jüba ko yuje tsü lile; Nü lümlongnü I lasih jengjüng.

⁷ I münyi pehjüng ko Ih müsa linung; Ih thsütohjüng ko Ih shurü tenü athru-u kangnung.

⁸ Akünyang ko alongphi yuva tsü I khyang yuchisohng; ko Nühnü Ih münohnah ko thsangnyangjünye, Ih anyüpiu künyangnung.

⁹ I münyi chah tüdhing ko I amütsa apüm nipehjüng.

¹⁰ I chah lasih asi khüdu thrijüng, O Tsingrang, ko I chah lasih asi ko yochonyiba anbü yohjüng.

¹¹ Nü tenü Ih tüipeh; I chahnü Amüsa anbü tükhyümüi.

¹² Nüh akangcheh lanü roba akünyang I khyang thali jüng, ko Ihnü Nü yocho nyisohng.

¹³ Hütsüde Ihnü münyirü te Nü yuzeng donung, ko arühnü Nüh yang ximülanung.

¹⁴ Ih ditpang! O Tsingrang, ko Ih khümchoung, ko Ihnü künyangseh Nüh Amüsaba sobhonung.

¹⁵ Ihnü chonung troung, Abüdongba, ko Ihnü Nüh senung.

¹⁶ Nühnü kangmübü mükhyünyüre, ama, Ihnü jünung kohle; trüp mübüla Nühnü mükünyangre.

¹⁷ I kangmübü tsü alonglüm anbü, O Tsingrang; alonglüm ko thsamülacho lasih Nühnü müdhsonglinung.

¹⁸ O Tsingrang, Zion müing ko abükyü troung; Jerusalem tbü külüpchijüng.

¹⁹ Hütsüde yuje kangmübü ko ihrü trüp mübübala Nüh künyangnung; ko Nü bholu chah misüpung kangmübü jünung.