NENGSEKHI 50 - AMÜSA BAIBEL (BSI)

Yuje Amübü

¹ Akohbong Tsingrang, Abüdongba-nü chore; Abinü nyüchüronü nyüzüdu chii liküprü dsire.

² Tsingrangba-nü adekheng atsah atsa Zion lanü hekehjüre.

³ Ihsa Tsingrang role, ta sahmüthsa mah; Abete truyaba miloh ko Abi mükang adrünung tsingxinyübong lile.

⁴ Abinü amüyurü yukhacho yuzi thsanung ning ko alih dsire.

⁵ Abinü yore, “sürünü Ite kangmübü khu zengtacho, Arüh I yanglang nübülung.”

⁶ Tsingrangba Amüsaba tsü ningnü sobhore, Abi tsü yukhabong.

⁷ “Nyieng, I müyurü, Ihnü chonung; Israel, Ihnü nüh nyüm yuzi jünung. Ih Tsingrangba, nührü Tsingrang.

⁸ Nü kangmübü shulüm ko lede hiroba tah mübüba shulüm Ihnü nüh mükhatare.

⁹ Kuh lanü misüpung müdhsütah, mahkhang atii lanü miza müdhsütah;

¹⁰ mürong la kanglungrü apüm, ko akhang hajar chah rachiba misüti Iyo lile.

¹¹ Rangmü uzati ko, alih la akang liba apüm Iyo.

¹² “Ih yangrelang, nüte müyonung, tunüo alimih ko hütsüla zehba apüm Iyo.

¹³ Ihnü misüpung shuh tsurü mah-o, ko miza shüh yongrü mah-o?

¹⁴ Nengse jüba tsü Tsingrangba khyang kangmübü thsasohng, ko Akohba khyang nühnü nyengchocho apüm jüng.

¹⁵ Dhsangthsi mütohde Ite dsing; Ihnü nüh khümchonung, ko nühnü Ih senung.”

¹⁶ Ta Tsingrangba-nü amütsarü te yore, “Tuepü nühnü I yuzeng khiro? Tuepü nühnü I azengtacho nengdang choro?

¹⁷ Müchongchijücho nühnü mükhyü, nühnü I yuzeng mükhyücho.

¹⁸ Nühnü shirücho aführü müipi te shangrü kangre, ko nahtrahnaxengrü te mükhongre.

¹⁹ “Amütsa chonung rungnüm du lire; arahkheh chonung khodesü müring.

²⁰ Nüpu jünirü mülangjünung rungnüm du lire, ko arüh mülang rangnung müküpre.

²¹ Nühnü hiri apüm nguchiko ko Ihnü nüte tu müyo, hütsünü Ih mii nüh kyolepü nühnü lümko. Ta ade Ihnü nüh khatare, ko nüh müzahsohre.

²² “Nührü I sehtirüti, hi nyieng, mahkhang Ihnü nührü changjünung, ko nührü khümchonung süsü mülinung.

²³ Nengse jüba tsü Ih dhichiba kangmübü lile, ko Ite nyirü atümung Ihnü khümchonung.”