NENGSEKHI 5 - AMÜSA BAIBEL (BSI)

Khümchonung Kihchicho

¹ Iyu nyijüng, O Abüdongba, ko I rühchicho nyieng.

² Arüku nengdang Ihnü züdecho nyieng, I Tsingrang ko I yangthsabong. Ihnü Nüte kihchire, O Abüdongba!

³ Anyangnyü Nühnü I yuva yuchire; nyü chürode Ihnü dangkhidangnangre ko Nü alalingba yingre.

⁴ Nüh amütsa nguchirü te künyangba Tsingrang khüdu mah; Nü lichola amünyi mükhuchüre.

⁵ Nühnü künyangküshirü müphikhümnung; Nühnü akhürahrü thrünyire.

⁶ Nühnü arahkheh chorü apüm changjüre ko shühkhatohrü ko akihyochürü thrünyire.

⁷ Ta Nü amüi dirachonü Ih Nü kuh la zürochehre; Nüh Amüsa mübükuh la Ihnü mübüchehre ko jengrengjo Nü jingte mükhukehre.

⁸ Abüdongba, I rorüh khütango lile! Nü lümcho I khyang nguchisohng; I ronung Nü lang müchong kangsohng.

⁹ I rorünü yocho khodesü müyudsicheh; arühnü changjünung du mürure. Arüh yu tsü arahkheh ko aküna, ta akhürah müyühnü jeng lile.

¹⁰ Mülangjüng ko arüh khingching, O Tsingrang; Arühbürü rahla arüh changsohng. Arüh münyi khütango ko arühnü Nüh nyümcho ngang, Nü tenü arüh iipehng.

¹¹ Ta Nü chah akhümcho ngurü atümung künyangtanung; akünyangnü arühnü lede khi thsanung. Nü müirü khümchoung; Nüh khu arüh yuje akünyang lile.

¹² Nü yocho nyirü müwajüng, Abüdongba; Nü amüinü tsungnü roh-i arüh khümchore.