NENGSEKHI 49 - AMÜSA BAIBEL (BSI)

Kuthsi Chah Longlangba Amüsithsa

¹ Atümungnü hi nyieng! Apümlang liba nyitsarütinü nyieng,

² amülah ko aikyah apüm, alirü ko ailümrü atümungnü.

³ I lümcho tsü asoh; Ihnü lümlong yu chonung.

⁴ Ihnü choyoh yu lahpi müci jünung, ko Ihnü tbenglah tiide hütsüri adüzü yonung.

⁵ Amünyi nyitsarü arüh lichola longlangpü,

⁶ ko arüh kuthsi amülahla müthsehrü I rorünü thsitinye Ihnü müdrünung.

⁷ Nyüh khüdu apu jangjang mükhümchocheh; abinü Tsingrangba khyang abi akang ngang amii müjücheh,

⁸ tunüo amüi tsurü akang khüdu amii tsü dirale. Tunüsü hütsüte müjang dhingnung mükoh.

⁹ Hütsü mahkhang abi kong tenü za, khüta lede akang lichehnung.

¹⁰ Asithsa nyitsarü mii, amüsithsa ko adohrü kyo sücho atümungnü ngure, Atümungnü arüh kuthsi apüm arüh shümtsurü khyang pehjüre.

¹¹ Kong tsü lede nengdang arüh kuh; arüh khüdupi arühbürü lih linye, hütsüla arüh lede linung.

¹² Nyitsarü mülahchonü asülanü abi mükhümchocheh; kanglungrü kyo abisü sünung.

¹³ Sürünü abürü chah longlangro, sürünü arüh kuthsi chah longlangro, arüh suro tsü dhing,

¹⁴ arüh san kyo sünung mülangjüko ko Asüba tsü arüh san-nyahrü linung. Arüh kuh lanü ashu wüpü asülih la arüh fü zahnü kong la sühnahnung, arüh michah Amüsarünü kohnung.

¹⁵ Ta Tsingrangba-nü Ih khümchonung; Abinü asü zii lanü Ih khümchonung.

¹⁶ Nyüh khüdu alirü kangde ko abi kuthsi alaa kangde nüh tüwah;

¹⁷ abi süde abinü hütsü mühitsinung; abi kuthsi abi kong yang müwünung.

¹⁸ Nyüh khüdunü hiba akang hinü longsünye, ko abinü kohcho nengdang senye.

¹⁹ Müchangkapü marürah liba, abi süde arüh jümürüti yang wünung.

²⁰ Nyitsarü mülahchonü asülanü abi mükhümchocheh; kanglungrü kyo abisü sünung.