NENGSEKHI 48 - AMÜSA BAIBEL (BSI)

Tsingrangba Yangdi Zion

¹ Ihsa Tsingrang yangdila, Abi Amüsa zong la, Abüdongba arangcheh dee seing.

² Zion, Tsingrangba zong tsü athseng ko atsah atsa, Yangthsaba amülah yangdi tsünü limih apüm khyang akünyang hirojüre.

³ Tsingrangba-nü yangdi roshengvi pohki tsü Abi te akhümcho lilepü ngusohre.

⁴ Yangthsarüti mükhongpü Zion Khang benung rocho.

⁵ Ta arühnü hütsü ngude, nyemüyangcho; arühnü drücho ko shehlicho.

⁶ Khingkurü akhunga zatbünung thsacho kyo, adrünung tsingxinyübongla kihkuh mülingchicho kyo,

⁷ arüh adrü ko lümtohnü rangcho.

⁸ Tsingrangba-nü tu nguchicho ihrünü yuchiko, ko Akohba Abüdongba, Ihsa Tsingrang yangdila ade ihrünü nguko. Abinü yangdi tsü lede khümcho yohpünung.

⁹ O Tsingrang, Nü Amübükuh yonglang, ihrünü Nüh amüthrehba amüi nengdang lümre.

¹⁰ Apümlang nyitsarütinü Nüh sere, ko lihküp la Nü nengsere. Nühnü yuje la yangthsare;

¹¹ Zion nyitsarüti künyangsohng! Nühnü athsalang yukhajüre; Juda yangditila akünyang lisohng!

¹² Tsingrangba nyitsarüti, Zion mükang tsehng, ko rangrangkuh khidhing;

¹³ nühnü aronung shang te yochehnungthsa, tbü ko roshengvi tsü dhingyohng.

¹⁴ “Ihsa Tsingrang hi achangka müli Tsingrang, Abinü aronung shang apüm la Ihsa nünung.”