NENGSEKHI 46 - AMÜSA BAIBEL (BSI)

Tsingrangba Ihsa te Zehle

¹ Tsingrangba Ihsa tsikehchah ko re, dhsangthsila tronung lede rungnüm lile.

² Hütsünü limih shühchinye ko azongti kihjü asoh la shohjonye;

³ Kihdi rihlong chüro khongnye, ko hütsü khu azong shühchinye Ihsanü müdrünung.

⁴ Tsingrangba yangdi ko Amichahba, Amüsaba kuh khyang akünyang hirojüba yongkhi khüdu lile.

⁵ Tsingrangba hütsüba yangdila lire, ko hütsü khodesü müthsangnyangnung; anyangnyü mütoh hütsü tronung Abi ronung.

⁶ Yanglihti drümüyangre, yanglihti shühchire; Tsingrangba-nü mütire, ko limih züchangre.

⁷ Akohba Abüdongba Ihsa te lile; Jakob Tsingrang tsü Ihsa tsikehsing.

⁸ Abüdongba-nü tu nguchicho rung ko dhing. Limih chah anyemüyangnung nguchicho dhing.

⁹ Abinü lihküp la khata zahsohre; Abinü singthsalu khyahnahre, thsuh khyahnahre ko tsung michang la yohre.

¹⁰ Abinü yore, “Khata zahng” ko yanglihti yola adiuba, limih chah adiuba, Tsingrang Ih-epü müdheing.

¹¹ Akohba Abüdongba Ihsa te lile; Jakob Tsingrang tsü Ihsa tsikehsing.