NENGSEKHI 44 - AMÜSA BAIBEL (BSI)

Atsungtinung Akihchiba

¹ Ihrü nangkhinü hütsü yuchicho, O Tsingrang, Ihrü jümürü chichah Nühnü tu nguchicho;

² Nühnü khüta müyudsirüti iipehpü arüh lih la Nü nyitsarüti lisohcho; ko aparü yuchoti khüta khingchipü Nü müyurü müwajücho, hütsü ihrü jümürünü ihrü te yoko.

³ Nü nyitsarütinü arüh thsunohrünü alih tsü mümahcheh; arühbürü tasenü hütsü mükoh; ta Nü zii ko tasenü, Nühnü arüh müicho, Nüh zehcho khu ngusohcho.

⁴ Nüh I yangthsaba ko I Tsingrang; Nü müyurü khyang Nühnü akoh jüre,

⁵ ko Nü ziinü ihrü rorüh kohcho.

⁶ Ihnü Ipu khümchonung singthsalu ko I thsunohrü chah longmülangre;

⁷ ta Nühnü arorüh khehlanü ihrü khümchocho ko ihrü thrünyirü kohjücho.

⁸ Ihrünü lede Nüh senung ko müchangkapü Nü khyang anengse jünung.

⁹ Ta ade Nühnü ihrü mükhyücho ko ihrü kohchehsohko; Nühnü adelü ihrü rothsarü yola müwü.

¹⁰ Nühnü ihrü rorüh bete tsisohko, ko arühnü ihrü yo khyüko.

¹¹ San kyo Nühnü ihrü kyüsehsohko; limih palang ihrü tsishosohko.

¹² Nühnü Nüpu müyurüti arüh amii aikyah duepü lüm, shiyüp iko.

¹³ Nühnü ihrü te tu nguchicho hütsü kurümrünü ngure, ko arühnü ihrü chah müthsamünyü münyodhingre.

¹⁴ Yuchoti yola Nühnü ihrü ashusha khüdu kangsohko; arüh ku ngahchi ihrü chah münyodhingre.

¹⁵ Ih lede mihmüxüpre; I rorüh ko I thrünyirütinü

¹⁶ mükhimüngu nyüpmüsehcho yuchi Ih shahsehre.

¹⁷ Ihrünü Nüh münbüchü ko azengtacho müthsangnyangnye, hiri apüm ihrü chah tikehko.

¹⁸ Ihrünü Nü yocho mühnyi mühle; Nü yuzeng mühnyipü mühle.

¹⁹ Ta Nühnü rangmü kanglungrü yola ihrü atrorü müli pehjüko; Nühnü ihrü amarürah asoh la dsongpüko.

²⁰ Ihrünü ihrü Tsingrang mümübüpü yangpirü tsingrang mübürelang,

²¹ Nühnü hütsü rangchehpü libae, tunüo Nühnü ihrü arang lümlong müdhele.

²² Ta Nü khyanglangnü shikhe apüm la ihrü müpsehre ko amüpsehba san kyo ihrü bichire.

²³ Jesung, Abüdongba! Nüh tuepü yüpjoro? Nü jangjang surung! Achangka müli ihrü tüpehjü!

²⁴ Tuepü ihrü tenü rang liro? Ihrü chongcha ko dhsangthsi tünbüchü!

²⁵ Ihrü alih la thungsehko; ihrü asongsongla khülu jore.

²⁶ Nüh ihrü tronung rung! Nüh amüthrehba amüi khyanglangnü ihrü khümchoung!