NENGSEKHI 42 - AMÜSA BAIBEL (BSI)

VAKHA ANYÜH Nengsekhi 42-72 Yangtsirü Khüdu Akihchiba

¹ Shümüshünü kihnatung nahmürahcho kyo, Ihnü Nüh mükhyahre, O Tsingrang.

² Ihnü Nüh mükhyahre, akang liba Tsingrang; khode Ih ro Nüh mübünung?

³ Ama atsingse Ih trare, I tsuyongnung tsü nahshükih du; müjangmüji I rorütinü “Nü Tsingrang khüde liro” pü Ite tsingdhingre.

⁴ Atsicho bekhyah lümchehde I lasih thsangnyangre, khode Tsingrangba kulang amülung yola arüh nüpü yanglongdse wücho, mülung khüdunü khithsa züde Tsingrangba secho.

⁵ Tuepü Ih hitoh-i longriro? Tuepü Ih hitoh-i chongcharo? Ihnü Tsingrangba chah I longdi yohpünung, ko adesü Ihnü I khümchobong, I Tsingrang nengsenung.

⁶ Ih yangtsi hila I lasih thsangnyangre, hütsünü I lümlong Abi yang ximülare. Abinü I nbüla alongri kiloh müthehcho;

⁷ Hermon khang ko Mizar khang lanü Jordan yang kihsasa ningki jürocho kyo, I chah kihloh kyo lümdhamanü rengkehjüre.

⁸ Ihnü aromang khi thsanung ko I kang Tsingrang khyang dangkhidangnang khüdu jünungthsa, Abüdongba-nü anyümong Abi amüthrehba amüi ngusohng.

⁹ I khümrü Tsingrang te Ihnü yore, “Tuepü Nühnü Ih nbüchücho? I rorüh amütsa kheh la tuepü Ih hita chongchanung?”

¹⁰ Arühnü lede Ite, “Nü Tsingrang khüde liro” pü tsingdhing nyüpmüseh Ih khingchire.

¹¹ Tuepü Ih hitoh-i longriro? Tuepü Ih hitoh-i chongcharo? Ihnü Tsingrangba chah I longdi yohpünung ko adesü Ihnü I khümchobong I Tsingrang nengsenung.