NENGSEKHI 39 - AMÜSA BAIBEL (BSI)

Chongcharü Anyengchoba

¹ Ihnü yocho, “Ihnü I nguchila müzahmükinung, ko I mülenü amünyi müshitpahsohnung; I shündhün amütsarü lide Ihnü tu müyonung.”

² Atsa nengdangnye, Ihnü yu khüdusü müyo, Ihnü sahmüthsa licho. Ta I chongcha alaa amütsau du kangcho,

³ ko Ih alümxünü jengcho. Ihnü alaa lümde, Ih alaa du chongchacho; Ihnü mütsingpü mülichehcho:

⁴ “Abüdongba, Ih khütoi nyahli linung? Ih khode sünung? I kang khode changkanung young.”

⁵ Nühnü I kang khütoi khira thricho! Nü nahtse te I akangli hi tu pa mah. Yuje nyitsarü hi chipehba sah tenü tu mah,

⁶ nbükhüm khüdu tenü papa mah. Abinü nguchiba apüm adeng; abinü kuthsi khyübülungre, ta hütsü sünü khyünungnang mümüdhe.

⁷ Khang Abüdongba, tu nengdang Ihnü longdinung? Ihnü Nü chah I alongdi yohpüre.

⁸ I münyi apüm lanü Ih khümchoung, ko amüsithsarü khyang Ih tümünyodhingsoh.

⁹ Ihnü sahmüthsanung, Ihnü yu khüdusü müyonung, tunüo Ih hiroh-i chongchasohba tsü Nühnüe.

¹⁰ Adelü Ih tükhingchi. Nü khehyehnü Ih sünung thsale.

¹¹ Nühnü nyitsarü khüdu münyi yübübanü khingchire, ko abinü müiba tsü Nühnü azah kyo changjünung. Yuje, nyitsarü hi nyübong sah khüdu tenü papa mühle.

¹² I kihchicho nyijüng, Abüdongba, ko I züdecho nyidhing; Ih trade ro Ih kihchoung. I jümürüti kyo Ih azachah nengdang Nü shirü lile.

¹³ Ih müsüpah-ede, Ih akünyang ngunungthsa I müleng pehjüng.