NENGSEKHI 38 - AMÜSA BAIBEL (BSI)

Chongcharü Dangkhidangnang

¹ O Abüdongba, Nü zichüronü Ih tükhingchi!

² Tbüdengnü Nühnü Ih dhsakehjüko; Nühnü Ih xüptsuko.

³ Nü zichürochonü Ih dee dhsale; I münyi khu Ifü apüm adhsaranü jengko.

⁴ I münyi I thah chah tuwüko; I nengdang bhamüling hi dirale.

⁵ Ih dohchonü I madhsa sühre ko xümre.

⁶ Ih kohthsüko ko jümtpahko; Ih mükhyang longrire.

⁷ I füdhsacho trüpsehre, ko Ih sünungthsare.

⁸ Ih kyahpehko ko jümtpahko; I lasih mükyahshangchehnü rühchire.

⁹ O Abüdongba, I mükhyahcho Nühnü müdhele; I rühchicho Nühnü yuchile.

¹⁰ I lasih thüthohre, I tase thümpehko, ko I nah la avisa changpehko.

¹¹ I madhsa thsachonü I shangrü ko kurümrüti I amünyeh mürore; tsutpurünü mii Ih mürire.

¹² I müpsehnyürünü zeng thsapüjüre, I dhsakehjünyürünü Ih changjünung mütichire; Ih nyüm rah külüpba müzahre.

¹³ Ih anangtbengrü roh-i müyuchire, müle jahrü kyo müchochehre.

¹⁴ Ih anangtbengrü kyo mülalingre, tunüo abinü müyuchire.

¹⁵ Ta Ihlü Nü chah longdire, O Abüdongba, O Abüdongba I Tsingrang, Nühnü Ite lalingnung.

¹⁶ I wahcho ngu I rorüti tükünyangsoh; I khülucho ngu arüh tümüthsehsoh.

¹⁷ Ih akhülurüe ko I tohdhsa müzahre.

¹⁸ Ihnü mülang nyengchore; I münyi nengdang wah lümre.

¹⁹ I rorüti akhümkhüm ko re azeh; yuzi mülipü I thrünyirü khütang lile.

²⁰ Atsa mülih amütsa jürünü Ih nyümre, tunüo Ihnü yuje du nguchinung lümre.

²¹ Ih tüthrüchahchübeh, O Abüdongba; Ih tüpehjü, I Tsingrang!

²² Ade Ih troung, O I Kangchehjüba Abüdongba!