NENGSEKHI 37 - AMÜSA BAIBEL (BSI)

Atsa ko Amütsa Achangka

¹ Amütsarü thsacholanü nüh tüwah; amütsa nguchirü tümükhyah.

² Za kungcho kyo arüh zah changpehnung; arüh singva kyo mükupehnung.

³ Abüdongba chah yudsing ko atsa nguching; hütsükhang alih la tsü khümcho linung.

⁴ Nü akünyang Abüdongba chah yangching; ko Abinü nü mürucho jünung.

⁵ Abüdongba khyang nüpu jüng; Abi chah yudsing, ko Abinü nüh tronung;

⁶ Abinü nüh Amüsaba nyüthung nyü kyo kangsohnung.

⁷ Rangchoung ko Abüdongba-nü nguchicho ying; sürü müwaro ko amünyi lümchung khu akoh nguro arüh nengdang tülümxü.

⁸ Tülümxü mahkhang zii tüchüro; hütsünü achongcha yang du nünung.

⁹ Abüdongba chah yudsirünü alih thsiking khyünung, ta amütsarülü iipehnung.

¹⁰ Tunyah mülipü amütsarü changpehnung; nühnü arüh yangchinung, ta müngunung;

¹¹ Alonglümrünü alih tsü ngunung ko amüwa ko yangtsa la künyangtanung.

¹² Amütsarünü nyitsarü atsa nyüm rah külüpre, ko abi thrünyi dhingre.

¹³ Abüdongba-nü amütsarü münyodhingre, tunüo arüh tunyah mülipü changnungepü Abinü müdhele.

¹⁴ Amütsarünü ailümrü, chongcharü müpsehnung ko atsa nguchirü müpsehnung arüh nohsheng tohchehre ko singthsalu hehkehre;

¹⁵ ta arühbürü nohshengnü arüh kyüsehnung, ko arüh singthsalu khyahnahnung.

¹⁶ Nyitsarü atsa kheh la aikyah liba tsü amütsarü atümung kuthsi tenü awüba,

¹⁷ tunüo Abüdongba-nü amütsarü tase hitsijünung, ta atsarü tsungtinung.

¹⁸ Abüdongba-nü Abi yocho nyirü xükümre, ko alih tsü lede nengdang arüh yo kangnung.

¹⁹ Thsamütsa rode arüh müchongchanung; yangkong shikhe arüh kükyo linung.

²⁰ Ta amütsarülü sünung; rangmü yungpi kyo Abüdongba rorüti changnung; arüh mikhu kyo changpehnung.

²¹ Amütsarünü nyare ko müsahre, ta amüsarünü amüinü jüre.

²² Abüdongba-nü müwajürütinü alih thsiking ngunung, ta Abinü chokehcholarü iipehnung.

²³ Nyüh khüdu abi wünung lang tsü Abüdongba-nü nüre, ko Abi künyangsohrü tsungtire.

²⁴ Arüh ngasehnye, müthungsehnung, tunüo Abüdongba-nü arüh khamüsunung.

²⁵ Adelü Ih shiko; Ih nyahli liko, ta Abüdongba-nü amüsarü thrüchahchüpeh mahkhang arüh tsurü chingkichingnang Ihnü khodesü müngu.

²⁶ Shikhe apüm la Abinü amükangnü jüre ko nyasohre, ko abi tsuzarütisü amüwa kangre.

²⁷ Amünyi lanü zang ko atsa nguching, ko alih la tsü nü trah lede linung;

²⁸ tunüo Abüdongba-nü yuje tsü müire; ko Abi müyurüti thrüchahchü müpehjüre. Abinü lede arüh tsungtire, ta amütsarü trah iipehnung.

²⁹ Amüsarünü alih thsiking khyünung ko hütsüla müchangkapü linung.

³⁰ Amüsarü belanü lümlong chürore, ko amülenü yuje yu chore.

³¹ Abinü Tsingrangrü yuzeng alasih la yohpüre ko khodesü hütsülanü müzare.

³² Amütsarünü amüsarü thsehre ko kyüsehnung müküpre;

³³ ta Abüdongba-nü abi rorüh kheh la abi müjünung mahkhang abi yukhade mümülangjüsohnung.

³⁴ Abüdongba chah nü alongdi yohpüng ko Abi yuzeng bichieng; Abinü nü khyang alih jonü nüh khichinung, ko amütsarü iipehcho nühnü ngunung.

³⁵ Ihnü shaphara akhürahrü nyitsarü khüdu müdhecho; abinü Lebanon la liba Cedar kyo atümung khyangti licho;

³⁶ ta akalang Ih lahkhu tside abi hütsüla mülicho; Ihnü abi yangchicho, ta müngucho.

³⁷ Nyitsarü atsa dhingyohng, amüsarü tsüpm, yangtsa nyitsarü suchehre,

³⁸ ta münyirülü mülohpehre ko arüh trah changpehre.

³⁹ Abüdongba-nü Amüsarü khümchore ko arüh chongchala tsungtire.

⁴⁰ Abinü arüh trore ko khümchore; Abinü amütsarü chahnü arüh khümchore, tunüo arühnü Abi atsungtiba yangchire.