NENGSEKHI 36 - AMÜSA BAIBEL (BSI)

Nyitsarü Khürahcho

¹ Amünyinü amütsarü te lasih yonglangnü chotare; Abinü Tsingrangba mükhyüchore ko Abi jengreng drüba mühle.

² Tunüo abinü apu jangjang dira lümre. Tsingrangba-nü abi münyi rangcheh hütsü mümülangjünungepü abinü lümre.

³ Abinü choba tsü amütsa ko arahkheh dunü jeng lile; abinü adelü athsalang ko atsa tsü münguchire.

⁴ Abi chongnong chah yüpjode amünyi rah chungre; abinü tu atsa nguchi mühle, ko abinü amütsa khodesü müdhsonglire.

Tsingrangba Atsaba

⁵ Abüdongba, Nüh amüthrehba amüinü ninglanglih chihre; ko Nü longlangchehbanü ning chihre.

⁶ Nü Amüsaba tsü azong kyo athseng; Nü yuje tsü kihdi asoh kyole. Nyitsarü ko kanglungrü Nühnü xükümre.

⁷ Abüdongba, Nüh amüthrehba amüi tsü khüta thsidi! Nü qo khümki ihrü akyahshang ngure.

⁸ Nühnü chixiba akükyüh tsuyongbala ihrü künyangtare; Nühnü atsauba yongkhi lanü ihrü yongsohre.

⁹ Nüh akang atümung pohchehji, ko Nü atsingse khu ihrünü atsingse ngure.

¹⁰ Nü müdherü mütozah müing ko amüsarü te atsa nguching.

¹¹ Amüthsehrü khyang Ih tüpehsoh, mahkhang amütsarü bete Ih tütsisoh.

¹² Amütsarü khülu liba tsü dhing, hütsüla müshemüsucheh khülu lile.